Në vitin 2019, ish-presidenti amerikan Donald Trump urdhëroi Agjencinë Qendrore të Inteligjencës (CIA) të fillonte një operacion të fshehtë në rrjetet sociale kineze me qëllim të kthimit të opinionit publik atje kundër qeverisë së saj, sipas ish-zyrtarëve amerikanë me njohuri të drejtpërdrejta për operacionin shumë të klasifikuar, raporton Reuters.
Sipas tre zyrtarëve, CIA mblodhi një ekip të vogël operativësh të cilët më pas përhapën narrativa negative për qeverinë e Xi Jinping përmes llogarive të rreme të mediave sociale dhe dërguan lajme të rreme në mediat e huaja.
Ekipi i CIA-s përhapi akuza se anëtarët e Partisë Komuniste në pushtet po fshihnin përfitime të paligjshme jashtë vendit, si dhe iniciativa e Kinës “Belt and Road” ishte e korruptuar dhe shpërdoruese, thanë burimet për Reuters.
Ndërsa zyrtarët amerikanë refuzuan të japin detaje specifike rreth operacioneve, ata thanë se historitë bazoheshin në fakte, pavarësisht se operativët e inteligjencës i publikuan ato në mënyrë të fshehtë me identitete të rreme.
Nxitja e paranojës
Përpjekjet brenda Kinës kishin për qëllim të nxisnin paranojën midis zyrtarëve të lartë atje.
Zëdhënësja e CIA-s, Chelsea Robinson nuk pranoi të komentojë mbi akuzat e operacionit, qëllimet apo pasojat e tij.
Një zëdhënës i Ministrisë së Punëve të Jashtme të Kinës tha se operacioni i supozuar i CIA-s tregon se qeveria amerikane po përdor “platformat mediatike si një armë për të përhapur informacion të rremë dhe për të manipuluar opinionin publik ndërkombëtar”.
Reuters nuk mund të përcaktojë ndikimin e operacioneve të fshehta ose nëse administrata e Presidentit Joe Biden vazhdoi operacionin e CIA-s.
Trump, tani kandidati republikan për president, ka njoftuar se do të marrë një qasje edhe më të ashpër ndaj Kinës nëse rizgjedhet president në nëntor. /tesheshi.com/
