Në Berlin u morr një vendim që duket sfidues për Open Balkan, pasi tejkalon lëvizjen e lirë mes tyre shtetesh të Ballkanit të Hapur, duke i hapur rrugë lëvizjes së lirë për të tërë rajonin. Kjo, në kuadër të Procesit të Berlinit.
Marrëveshja u arrit pikërisht në Berlin, në takimin ministerial në kuadër të Procesit në fjalë, përpara samitit të liderëve që mbahet në nëntor.
Pos lëvisjes së lirë, u arrit dhe marrëveshja për njohjen reciproke e diplomave universitare dhe kualifikimeve profesionale.
Në këtë kuadër, Sekretarja e përgjithshme e Këshillit të Bashkëpunimit Rajonal, Majlinda Bregu, tha se studentët që aktualisht paguanin deri në 500 euro vetëm për të njohur diplomat, me këtë marrëveshje kjo kosto do të jetë zero. Gjithashtu u theksua se muri i fundit i regjimit të vizave në Ballkanin Perëndimor, ai mes Kosovës dhe Bosnjes po zhduket.
Vulën këtyre marrëveshjeve jua vendosi ministrja e Jashtme gjermane, Annalena Baerbock.
“Kjo mund të tingëllojë si diçka teknike, por këto janë hapa historikë që ndryshojnë jetën e njerëzve. Kjo do të thotë që studentët nga Shqipëria mund të përdorin diplomën e tyre bachelor për të vazhduar studimet në Maqedoninë e Veriut dhe se një arkitekt nga Serbia mund të shkojë dhe të punojë në Mal të Zi. Kjo është diçka që bëhet edhe në tregun e brendshëm europian”, tha gruaja që drejton diplomaticnë e supërfuqisë europiane.
Më tej kryediplomatja gjermane tha se me nënshkrimin e këtyre marrëveshjeve, Ballkani Perëndimor bën një hap të rëndësishëm përpara në procesin e anëtarësimit në Bashkimin Europian.
Baerbock, ndër të tjera tha se kjo po lehtëson jetë e qytetarëve, po ndihmon kompanitë dhe rritjen ekonomike në mbarë rajonin. Në fund tha se prioritet i qeverisë gjermane është ruajtja e paqes, stabilitetit dhe progresit ekonomik të arritur në Ballkanin Perëndimor.
Vendet nënshkruese ishin Shqipëria, Maqedonia, Kosova, Serbina, Mali i Zi dhe Bosnja. /tesheshi.com/
