Në kuadër të synimit të presidentit amerikan për ta mbyllur burgun e Guantanamos, Pentagoni po planifikon të transferojë në më së paku dy vende një duzinë të burgosurish që gjenden në të.
Të burgosurit e parë priten të transferohen brenda pak ditëve, kurse në javën në vijim ka për t’u kryer dhe transferimi i pjesës tjetër. Njoftimin e dha një zyrtar amerikan, i cili nuk pranoi ta bëjë të ditur identitetin e tij.
Në burgun e Guantanamos ka aktualisht 91 të burgosur. Mes atyre që do të transferohen është dhe një jemenas që për një kohë të gjatë ka qenë në grevë urie.
Plani për mbylljen e burgut të Guantanmos ka ndeshur në kundërshtinë e republikanëve si dhe të një numri demokratësh në Kongresin Amerikan.
Mbyllja e burgut të Guantanamos mbetet ndër objektivat e Obamës para përfundimit të mandatit të tij si president i SHBA-ve. /tesheshi.com/
