Agjencia Evropiane e Hapësirës (ESA) ka njoftuar se një prej satelitëve të saj ka kapur një njollë nafte në zonën e Mesdheut, aty ku mendohet se është rrëzuar aeroplani i EgyptAir.
Agjencia thotë se sateliti i saj Sentinel-1A ka zbuluar njollën me gjatësi dy kilometra, 40 km në juglindje të lokacionit të fundit të njohur të aeroplanit të zhdukur, njofton AP.
ESA këtë informatë ia ka dorëzuar autoriteteve kompetente, me qëllim që t’i ndihmojë gjatë kërkimit.
Por agjencia thotë se nuk mund të garantojë nëse njolla e naftës është shfaqur si pasojë e rrëzimit të aeroplanit të zhdukur.
Sipas raportit, sateliti tjetër Sentinel-2A do të kalojë mbi këtë zonë të dielën, ndërkaq pamjet e do të studiohen me qëllim të gjetjes së gjurmëve eventuale për nevoja të hetimeve lidhur me fatin e aeroplanit të zhdukur.
Por ndërkohë, ushtria egjiptiane ka deklaruar se ka gjetur pjesë të aeroplanit të zhdukur të kompanisë EgyptAir, me 66 udhëtarë dhe anëtarë të ekuipazhit në të.
Siç thuhet, pjesë të aeroplanit të zhdukur janë gjetur 290 km në veri të qytetit mesdhetar të Aleksandrisë.
Marina po ashtu pretendon se ka gjetur disa gjëra private të udhëtarëve dhe për momentin është duke gjurmuar atë zonë, duke kërkuar për kutinë e zezë të aeroplanit, ka njoftuar Reuters.
Aeroplani i EgyptAir në fluturimin nr. 804 është zhdukur nga radari rreth orës 2:30 të enjten në mëngjes sipas kohës lokale, ndërsa ishte në lartësi prej 11.280 metra, ka thënë kompania. Në aeroplan ndodheshin 66 udhëtarë dhe 10 anëtarë të ekuipazhit. Aeroplani u zhdukur nga radari menjëherë pas hyrjes në hapësirën ajrore të Egjiptit. /tesheshi.com/
