Kolapsi i javës së kaluar i sistemit të trafikut ajror të Britanisë u shkaktua nga një ngjarje “një në 15 milionë”, tha agjencia e kontrollit të trafikut ajror NATS, duke thënë se një plan fluturimi me dy identifikues (emra përdoruesi) identike ishte shkaku i kaosit.
Mijëra pasagjerë mbetën të bllokuar jashtë vendit për ditë të tëra pasi 1500 fluturime u anuluan më 28 gusht gjatë një prej periudhave të pikut të udhëtimit veror.
“Kishte një në 15 milionë shanse që kjo të ndodhte,” tha shefi ekzekutiv i NATS, Martin Rolf për BBC. “Ne kemi përpunuar 15 milionë plane fluturimi me këtë sistem deri më tani dhe nuk kemi parë kurrë diçka të tillë më parë”, tha Rolf pak ditë më pare, duke shtuar se problemi nuk do të përsëritet më.
Raporti i NATS i lëshuar së fundi thotë se plani i fluturimit përfshinte dy pika të veçanta, por të emërtuara në mënyrë identike të rrugëve ajrore jashtë hapësirës ajrore të Mbretërisë së Bashkuar, të cilat e detyruan sistemin të hynte në një modalitet emergjence.
“Në këto rrethana, sistemi nuk mund të refuzonte planin e fluturimit pa një kuptim të qartë të ndikimit të mundshëm që mund të kishte. Ai as nuk mund ta lejonte atë dhe të rrezikonte t’u siguronte kontrollorëve të trafikut ajror informacione të pasakta, kritike për sigurinë,” tha NATS.
NATS tha se plani i fluturimit ishte në përputhje me sistemin e alokimit të planifikimit të fluturimit të Eurocontrol.
Autoriteti i aviacionit civil të Britanisë tha se do të shqyrtojë rrethanat në të cilat ndodhi problemi.
“Nëse ka prova që sugjerojnë se NATS mund të ketë shkelur detyrimet e saj statutore dhe të licencimit, ne do të shqyrtojmë nëse është i nevojshëm ndonjë veprim i mëtejshëm,” tha në një deklaratë Rob Beeston, drejtori i përgjithshëm i përkohshëm i Autoritetit të Aviacionit Civil të Mbretërisë së Bashkuar.
Kjo do të thotë që NATS mund të duhet të paguajë një pjesë të faturës për rrëmujën.
IATA tha se episodi mund t’i kushtojë linjave ajrore deri në 100 milionë euro pasi pasagjerët, fluturimet e të cilëve u anuluan mund të kërkojnë kompensim për hotelet në të cilat kanë qëndruar ose për biletat e reja që kanë blerë.
Easyjet me bazë në Mbretërinë e Bashkuar tha se raporti NATS la disa pyetje pa përgjigje dhe, ndërsa e mirëpriti raportin, besonte se duhej një rishikim i gjerë i sistemeve të informacionit (IT).
“Një rishikim plotësisht i pavarur dhe i gjerë i NATS është i nevojshëm për të siguruar që ai është i përshtatshëm për qëllimin sot dhe në të ardhmen,” tha Easyjet. /tesheshi.com/
