Epoka dixhitale, dëshmitarë të së cilës jemi të gjithë, sjell shumë fenomene që ngjajnë si rezultat i bashkëjetesës me teknologjitë e reja. Megjithatë, njëra nga ato është përherë e më e pranishme në përditshmërinë e milionave në mbarë botën. Nomofobia (no mobile phobia) është një nga fenomenet më të përhapura të shekullit të 21 dhe paraqet frikën e mbeturit pa një telefon celular, për shkak të zbrazjes së baterisë apo ndonjë arsye tjetër të mundshme.
Hulumtimet botërore tregojnë se, për shembull, të rinjtë e moshës 18-24 vjeçare janë më të ndjeshmit ndaj kësaj frike, duke pasur parasysh faktin se komunikimet e tyre bëhen kryesisht përmes aplikacioneve prezente në këto pajisje të mençura.
Numri i njerëzve të prekur me nomofobia u zbulua në një studim nga SecurEnvoy dhe tregon një rritje, në krahasim me një studim të ngjashëm katër vjet më parë, ku 53 për qind kanë pranuar frikën nga humbja e telefonit. Në studimin e fundit, prej 1.000 njerëzve të anketuar në Britani të Madhe, 66 për qind kanë pranuar se ndjejnë këtë frikë.
Simptoma kryesore e nomofobisë është shqetësimi që ndiejmë kur nuk kemi qasje në telefonin celular. Zbrazja e baterisë është një prej arsyeve kryesore pse përdoruesit nuk mund të shfrytëzojnë telefonin e tyre ndaj nuk është çudi pse tek një përqindje e madhe e konsumatorëve, jetëgjatësia e baterisë është faktor vendimtar gjatë përzgjedhjes së telefonit. Tjetër arsye e kësaj frike është edhe ajo e thyerjes potenciale të ekranit të telefonit.
Njerëzit janë të prirur të përjetojnë këtë fobi kur janë të pasigurt, ose kanë mungesë të vetëkontrollit dhe disiplinës, lehtë mërziten apo janë të padurueshëm, ose nuk kanë hobi tjera rekreative, etj./tesheshi.com/
