Kyriakos Mitsotakis është kryetari i ri i partisë konservatore greke Demokracia e Re. Djali i një ish-kryeministri të vendit, Konstantinos Mitsotakis-it, ai ka dalë fitues ndaj konkurrentit Evangelos Meimarakis. Në raundin e parë të zgjedhjeve partiake në 20 dhjetor, ai qe i dyti, për të përfunduar i pari mbrëmë, me 51 për qind të votave të fituara.
Ish-ministri i Reformës Administrative, 47-vjeçari Mitsotakis, ka si detyrë parësore sfidën ndaj qeverisë aktuale të Alexis Tsipras-it, çka e shprehu dhe në fjalën e tij të shkurtër pak pasi u mësua për fitoren, “Ne kemi një qëllim të përbashkët: t’i shprehim të gjitha ato forca që janë kundër populizmit të një qeveri jokompetente.”
Mitsotakis kërkon ta nxjerrë partinë e tij nga bataku i humbjeve në zgjedhje, dhe si përfaqësues i një familjeje me peshë të jashtëzakonshme politike në Greqi, ai ofron shpresë për mbështetësit e Demokracisë së Re.
“Mandati është i qartë”, u shpreh ai, “përtëritje krijuese dhe zgjerim, kështu që ne mund të sigurojmë një zgjidhje alternative qeverisëse për vendin.”
Mitsotakis ka studiuar në Harvard, njeh mirë anglishten, frëngjishten e gjermanishten, është i martuar dhe baba i tre fëmijëve. /tesheshi.com/
