Në aksin Fushë Krujë – Milot, në afërsi të Mamurrasit, është parë duke lëvizur në këmbë një njeri me veshje tërësisht ndryshe, duke tërhequr vëmendjen e kalimtarëve të rastit.
I gjithi nën një veshje të bardhë, ndërsa poshtë saj pantallona të shkurtëra, duke mbajtur në dorë një shkop të gjatë. Ndërsa në kokë, një lloj bezeje po me ngjyrën e bardhë të lidhur me një fjongo të zezë.
Por ç’të jetë ky rob’Zoti që duket sikur ka ardhur nga thellësia e shekujve që ka zgjedhur të vishet në këtë mënyrë duke ecur kilometra të tërë në këmbë për kushediseku?
Diku është ndalur për të pushuar anës xhadesë, ndërsa nga një çantë (trastë) ka nxjerrë qesen e duhanit duke gatitur një të tillë, dhe këtu ka qenë momenti për të bashkbiseduar, pasi shenja që ai ka dhënë më dredhjen e cigares, ishte një tregues i të qënit banor shqiptar.
Thotë se është nga fshatrat e Mirditës dhe se Zoti e ka udhëruar që të lëvizë në këmbë. “Do të mbërrij në Tiranë sot dhe nesër, ç’të më thotë Zoti. Prej 18 vitesh kam qëndruar emigrant jashtë vendit dhe para Zotit nuk më intereson asnjë pasuri”, shprehet ai pa ofruar asnjë detaj tjetër mbi veten dhe mbi arsyen se përse po shkon në Tiranë, qoftë dhe në këmbë. A. Zani – /tesheshi.com/
