Në prezantimin zyrtar si ministër i ri i Brendshëm, ish-kuadri i Policisë që do drejtojë sektorin delikat të rendit, Ervin Hoxha, listoi shkurtimisht disa prioritete, duke nisur nga reformimi gjithëpërfshirës në zinxhirin drejtues të Policisë së Shtetit, zhvillimin teknologjik për të parandaluar ngjarjet kriminale e rritur sigurinë publike, apo përmirësimin e sjelljes dhe etikën e trupës policore në raport me qytetarët.
“Ligji i ri Policisë së Shtetit do na mundësojë realizimin e një reforme të thellë në një ristrukturim dhe efikasitet për shërbimet e policisë, në kontrollin e territorit”, theksoi ministri Hoxha, i pari ministër jo figurë politike, por që vjen pikërisht nga Rendi.
Dhe tashmë pritet të shihet se ç’efekt do ketë ky fakt në terren dhe në bilancet e Policisë.
Hoxha zëvëndësoi Taulant Ballën, një emër tipik politik, i cili ushtroi për herë të parë një post ekzekutiv. Dhe interesant është fakti se ndryshe nga tradita opozitare e sulmit ndaj ço ministri Rendi, Balla ishte jashtë shënjestre.
Te ushtrimi prej tij i detyrës së ministrit të Rendit ishte e qartë prirja për të bërë diferencën me paraardhësit e tij socialistë. Dhe ndodhi realisht. /tesheshi.com/
