Për të katërtin vit me radhë, qytetarët e Kosovës protestuan kundër dhunës ndaj grave në kuadër të fushatës One Billion Rising (Një miliard në Këmbë).
Statistikat e raporteve hulumtuese nga Rrjeti i Grupeve të Grave të Kosovës tregojnë se në Kosovë, 48.5% e qytetarëve kanë përjetuar ndonjë formë të ngacmimit seksual, prej tyre 64.1% gra dhe vajza, ndërsa 35.4% burra dhe djem. Në anën tjetër, 62 % e kosovarëve kanë përjetuar dhunë në familje gjatë jetës së tyre, prej tyre 68% gra dhe vajza, ndërsa 56% burra dhe djem.
Adelina Berisha, hulumtuese nga Rrjeti i Grupeve të Grave të Kosovës dhe kordinatore për avokim tha se dhuna është mjaftë e shprehur ndaj grave në Kosovë, shtrirja është e njëjtë me statistikat globale, ku çdo e treta grua në Kosovë ka përjetuar ndonjë formë të dhunës ndaj saj apo dhunës në bazë gjinore.
“Statistikat botërore tregojnë se çdo e treta grua është viktimë e dhunës në familje, në këtë situatë jemi edhe ne në Kosovë.
Sa i përket dhunës në familje, Kosova e ka një infrastrukturë mjaftë të mirë, e cila ju ofron ndihmëviktimave të dhunës në familje, mirëpo gjithmonë duhet të kemi parasysh që ka hapësirë edhe për përmirësime. Kosova ende jeton në një shoqëri patriarkale, ku gratë shumë pak gëzojnë të drejtat e tyre, për këtë arsye edhe qëndrojnë në ambient ku ndaj tyre ushtrohet dhunë”, tha ajo.
Ndërsa, përfaqësueset e Rrjetit të Grupeve të Grave në Kosovë, thanë se duhet të kenë parasysh institucionet e Kosovës, se kur vjen rasti tek aspekti ligjor të qojnë drejtësinë deri në fund, ta dënojnë dhunuesin, të ia ofrojnë viktimës të gjitha të drejtat të cilat asaj i garantohen me ligj, si dhe të punohet më shumë në ri integrim dhe rehabilitim të tyre.
Ndryshe, në shkurt të vitit 2013, një miliard gra dhe burra në gjithë botën, dolën në rrugë dhe përmes vallëzimit protesuan për t’i dhënë fund dhunës ndaj grave dhe vajzave përmes fushatës One Billion Rising (Një miliard në Këmbë). Tani kjo fushatë ka përmasa globale dhe organizohet në më shumë se 190 vende të botës, përfshirë edhe Kosovën, që iu bashkangjt kësaj fushate që nga fillimi. /tesheshi.com/
