Kryeministri në detyrë Albin Kurti ka marrë një mbështetje europiane për idenë e zgjedhjeve të parakohshme, kjo pas një letre dërguar atij nga 6 eurodeputetë, siç janë Tanja Fajon, Viola von Cramon-Taubadel, Tonino Picula, Andreas Schieder, Evin Incir dhe Knut Fleckenstein.
Fillimisht ata i japin mbësheteje për të vijuar qeverisjen në këtë situatë delikate virusale, kur thonë se “të gjithë po përballemi me këto kohë të vështira, dhe na vjen mirë të shikojmë se ju po e përballoni situatën në mënyrën e përshtatshme”.
Ata kërkojnë edhe mostejkalim kompetencash kushtetuese në kuadër të krizës, duke i kujtuar Kurtit se “qeveritë e shumë shteteve anëtarë të Bashkimit Evropian më 1 prill janë shprehur kështu: ‘Në këtë situatë të paprecedentë, Shtetet Anëtare e shohin të ligjshme të përshtatin masa të jashtëzakonshme për të mbrojtur qytetarët e tyre dhe për ta tejkaluar këtë krizë. Megjithatë ne jemi shumë të shqetësuar për rreziqet që mund të sjellin shkeljet e parimeve kryesore të ligjit, demokracisë, dhe të drejtave themelore që rrjedhin nga miratimi i disa masave emergjente”.
“Duke qenë se jemi mbështetës të fortë të respektimit të parimeve kryesore të ligjit dhe demokracisë, ne jemi tej mase të shqetësuar për situatën politike në vend pas votimit të mocionit të mosbesimit kundër qeverisë tuaj dhe pas leximit të njoftimit të presidentit Thaçi mbi disa interpretime të mundshme kushtetuese. Askush nuk duhet ta keqpërdori krizën aktuale për lojëra politike. Dhe ne shpresojmë, se në Prishtinë ekziston akoma përgjegjshmëria.
Gjithashtu ne dëshirojmë t’ju falënderojmë për vendimin e heqjes së taksës ndaj mallrave serbe dhe boshnjake. Ne besojmë se ky hap i rëndësishëm do të inkurajojë disa shenja të vullnetit të mirë nga ana serbe”, thuhet në letër .
Në fund, gjykohet se zgjedhje të reja janë rruga drejt zgjidhjes së ngërçit politik pas rrëzimit të qeverisë me mocion mosbesimi, gjë të cilën e kërkon dhe vetë Kurti.
“Ne jemi të bindur, se Kosova ka nevojë për një qeveri funksionale, veçanërisht në këtë kohë krize. Pas krizës, zgjedhjet e reja do të vlejnë si një hap i nevojshëm për të ecur përpara, në përputhje me Kushtetutën tuaj. Ne, Anëtarët e Parlamentit Europian, jemi gjithmonë në krah popullit të Kosovës.
Ne vazhdimisht po negociojmë liberalizimin e vizave me Këshillin Evropian për qytetarët e vendit tuaj, dhe ne besojmë shumë se ju e meritoni me të vërtetë. Ne do të donim t’ju inkurajonim në luftën kundër çdo shpërdorimi të krizës së coronavirusit, e cila vetëm do tu jepte argumente shtesë atyre, që akoma punojnë kundër Kosovës”, përfundon letra e eurodeputetëve. /tesheshi.com/
