Ish-kreu i muslimanëve të Bosnjes, Dr. Mustafa ef. Çeriç i dërgoi një letër të hapur liderit çeçen Ramzan Kadyrov, aleat i ngushtë i presidentit rus Vladimir Putin, pas fillimit të pushtimit të Ukrainës, në të cilin marrin pjesë edhe luftëtarë çeçenë.
Mediat botërore raportuan dje se të paktën 10,000 trupa u dërguan nga Çeçenia për të mbështetur rusët gjatë agresionit kundër Ukrainës.
“I dashur Kadyrov, kam vizituar dy herë Çeçeninë. Për herë të parë në mars 2019, organizuar nga Liga Botërore Myslimane me rastin e konferencës: Islami – një mesazh mëshirë dhe paqeje.
Me atë rast ju dhurova lulen e Srebrenicës në kujtim të gjenocidit serb ndaj popullit tim në Bosnje.
Herën e dytë që vizitova Groznin u organizua nga Forumi Musliman Evropian me rastin e inaugurimit tuaj për mandatin e katërt në krye të Republikës Çeçene. Me atë rast, pata nderin të mbaj një predikim në xhaminë qendrore madhështore në Grozny, para një numri të madh të myslimanëve krenarë çeçenë, duke përfshirë rreth njëqind kadetë të policisë çeçene”, fillon letrën e tij Dr. Çeriç.
Ai tha se ishte “i impresionuar me mënyrën se si është zhvilluar ndërkohë qyteti i Groznit infrastrukturor dhe kulturor”.
“Unë ndava përshtypjet e mia me publikun boshnjak, duke rrezikuar që disa të mos e kuptojnë dhe ta pranojnë plotësisht. Sot qëndroj prapa përshtypjes sime për Çeçeninë, të cilën e shpreha publikisht me atë rast. Megjithatë, zoti Kadyrov, aq sa më bëri përshtypje rimëkëmbja çeçene e pasluftës nga ‘ndihma’ e Moskës, jam shumë i zhgënjyer sot me demonstrimin ofensiv çeçen të mbështetjes për Moskën, domethënë Vladimir Putinit, për sulmin e tij ushtarak në Ukrainë,” tha Ceriç, duke shtuar:
“Nuk kam ndërmend t’ju predikoj për marrëdhëniet tuaja personale dhe politike me Moskën, por kam të drejtë të them se marshimi i ushtarëve çeçenë me simbolin e ezanit dhe lutjes ka të bëjë me çdo musliman, veçanërisht muslimanët boshnjakë që i mbijetuan genocidit serb në Srebrenicë, ndërkohë që Vladimir Putin e mohon këtë genocid, pavarësisht vendimeve të plota në Gjykatën Ndërkombëtare të Drejtësisë në Hagë,” thotë ish-kreu i Bashkësisë Islame në Bosnje.
Dr. Çeriç vijon duke i thënë Kadyrov-itm se “mbështetja juaj e hapur për agresionin ushtarak të Putinit kundër Ukrainës ka ngjallur më tej frikë në popullin tim, sepse Milorad Dodik po kërcënon Bosnjën me ndërhyrje ruse për të njëjtën arsye që Putini kërcënoi dhe sulmoi ushtarakisht Ukrainën, që është anëtarësimi në NATO”.
“Prandaj, për shkak të ndërgjegjes sime, e cila është më e fortë se zemra ime, duhet t’ju them, zoti Kadyrov, qartë dhe pa mëdyshje se çdo mbështetje, veçanërisht ushtarake, ndaj Vladimir Putinit në fushatën e tij kriminale me pretekstin e denazifikimit të Ukrainës është një krim kundër njerëzimit”.
Ndaj, Dr. Ceriç i bëri thirrje liderit çeçen të ndalonte mbështetejn për kreun e Kremlinit:
“Dhe ju bëj thirrje, zoti Kadyrov, në emër të muslimanëve, veçanërisht të muslimanëve boshnjakë në Bosnje, të hiqni dorë nga mbështetja për Vladimir Putin, i cili nuk është njeri i mirë.
Vladimir Putin nuk e meriton ndihmën dhe mbështetjen tuaj në sulmin e tij ushtarak ndaj Ukrainës, i cili është i barabartë me sulmin ndaj Evropës, ku miliona muslimanë evropianë jetojnë me frikën e pushtimit rus. Me shpresën se kjo letër do t’ju gjejë me shëndet dhe vullnet të mirë për të pranuar argumentet e mia vëllazërore dhe joarmiqësore, pranoni shprehjet e konsideratave të mia për ju personalisht dhe për popullin krenar çeçen”, përfundoi Çeriç. /tesheshi.com/
