Në një letër të përbashkët dërguar Sekretarit Amerikan të Shtetit, Marco Rubio, ministrat e jashtëm të Egjiptit, Arabisë Saudite, Jordanisë, Emirateve të Bashkuara Arabe dhe Katarit kanë sqaruar qëndrimet e tyre për çështjen palestineze dhe situatën në Lindjen e Mesme, transmeton Al Jazeera.
Ata kujtuan se Lindja e Mesme tashmë është e ngarkuar me numrin më të madh të personave të zhvendosur dhe refugjatëve në botë dhe se shumica janë pikërisht palestinezët.
Rindërtimi i Gazës duhet të bëhet përmes pjesëmarrjes së drejtpërdrejtë të gazanëve: “Palestinezët do të jetojnë në atë tokë dhe do të ndihmojnë në rindërtimin. Ata nuk duhet të përjashtohen nga projekti i rindërtimit dhe duhet të marrin pronësinë e procesit me mbështetjen e komunitetit ndërkombëtar. Rajoni po mobilizohet, në bashkëpunim me bashkësinë ndërkombëtare, për të filluar rindërtimin e Gazës, i cili do të kulmojë me një konferencë ndërkombëtare në Egjipt në bashkëpunim me Kombet e Bashkuara”, kanë thënë ministrat e jashtëm të vendeve arabe në një letër drejtuar zyrtarit të lartë të Departamentit të Shtetit.
Ata shtojnë se Siria ka hyrë në një epokë të re “premtimi dhe shprese”, se armëpushimi në Liban po respektohet dhe se libanezët po rindërtojnë institucionet shtetërore “të vendosura për t’i dhënë fund ndikimeve negative të huaja”.
“Mesazhi ynë se marrëdhëniet rajonale duhet të ndërtohen mbi respektin e ndërsjelltë, mosndërhyrjen në punët e brendshme dhe respekti për të drejtën ndërkombëtare po bëhet më i fortë”, thuhet në letër, duke theksuar se mbeten shumë sfida: “Ne besojmë se mund t’i kapërcejmë ato, se mund t’i japim fund dekadave të konfliktit, se mund të eliminojmë terrorizmin dhe të rivendosim shpresën për rajonin dhe popujt e tij”.
Egjipti, Arabia Saudite, Jordania, Emiratet e Bashkuara Arabe dhe Katari thonë se janë partnerë strategjikë të Shteteve të Bashkuara dhe ndajnë një vizion paqeje me Presidentin Trump, me një mesazh të qartë se duan të jenë partnerë të përkushtuar në sjelljen e paqes, e cila është thelbësore për stabilitetin global.
Çështja e Izraelit dhe Palestinës
Pjesa e dytë e letrës i kushtohet zgjidhjes me dy shtete – Izraelit dhe Palestinës. Thuhet se kjo është e vetmja zgjidhje për një paqe të qëndrueshme dhe gjithëpërfshirëse: “Një Palestinë e qëndrueshme, e pavarur, sovrane me kufijtë e saj të bazuar në linjat e vendosura më 4 qershor 1967, me kryeqytet Jerusalemin Lindor, i cili do të jetojë përkrah një Izraeli të sigurt që do të pranohet nga fqinjët. Së bashku, ne do të vendosim siguri për Izraelin dhe Palestinën, duke luftuar të gjitha kërcënimet, përfshirë terrorizmin dhe ekstremizmin. Ne do të ndërtojmë ekonomi, do të rivendosim besimin në paqen për të cilën jemi të përkushtuar.”
“Në kuadrin e gjithë asaj që u tha, është e domosdoshme që Izraeli të mos aneksojë asnjë pjesë të tokës palestineze dhe një aneksim i tillë thjesht do të anulojë zgjidhjen me dy shtete. Dëbimi i palestinezëve nga toka e tyre do ta zhysë rajonin në tension, konflikt dhe destabilitet. Një veprim i tillë jo vetëm që do të përfaqësonte një shkelje të qartë të së drejtës ndërkombëtare, por do të ishte gjithashtu një kërcënim për stabilitetin dhe sigurinë rajonale. Palestinezët nuk duan të largohen nga toka e tyre. Ne e mbështesim njëzëri një qëndrim të tillë. Ndryshe, po hyjmë në një dimension konflikti të rrezikshëm”, theksohet në fund të letrës, ku shtohet: “Kemi një mundësi historike për rajonin tonë dhe botën. Paqja në Lindjen e Mesme mund të jetë trashëgimia e administratës Trump. Ju mund të mbështeteni në mbështetjen dhe angazhimin tonë të plotë në arritjen e këtyre qëllimeve.”
Letra drejtuar Sekretarit Amerikan të Shtetit Marco Rubio është nënshkruar nga krerët e diplomacisë së Egjiptit – Badr Abuelatty, Jordanisë – Ayman Safadi, Arabisë Saudite – Faisal bin Farhan bin Abdullah, Emirateve të Bashkuara Arabe – Abdullah bin Zayed dhe Katarit – Mohammad bin Abdulrahman bin Jassim al-Thani. /tesheshi.com/
