Orë pasi u publikua një letër e dërguar nga presidenti Meta në Bruksel, posaçërisht për Komisionierin e Zgjerimit Oliver Varley, ku këtij të fundit i kërkohet rishikimi i vendimit për hapjen e negociatave për shkak të “gërryerjes së demokracisë” në Shqipëri, ka reaguar kryeministri Rama.
“Për herë të parë që nga krijimi i Bashkimit Europian një president çon letra në Bruksel për të minuar urën mes Europës e vendit të tij! Për herë të parë në historinë e zgjerimit të BE një vend kandidat ka Brukselin PRO dhe Presidentin e vet KUNDËR vendit e KUNDËR vetë Brukselit”, shkruan Rama në një status, duke e trajtuar ankesën presidenciale në Bruksel si kundër Shqipërisë e jo si kundër qeverisë.
Për shefin e qeverisë, e gjitha kjo i rrënjët te lufta ndaj Reformës në Drejtësi.
“Sa nisi terapia intensive e Reformës në Drejtësi Shqipëria nisi dhe reaksioni me temperatura të larta në organizmin e shtetit të sëmurë prej kancerit të korrupsionit!Përpëlitjet e ethshme me bojkote, molotovë, dekrete janë thjesht pasoja të intensitetit të terapisë mbi kancerin”, arsyeton Rama.
Për të, kjo reformë do vijojë edhe në mos u hapshin negociatat.
“Shqipëria mund ta marrë mund të mos e marrë PO-në që meriton nga Këshilli Europian,po ama kurimi deri në fund i sëmundjes dërrmuese që i ka ngrënë trupin e shpirtin prej 30 vjetësh,as mund dhe as do ndalet dot me kriza të turpshme të provokuara nga terapia e Reformës në Drejtësi!”, shkruan i pari i qeverisë.
Por çfarë thuhej në letrën e Metës?
“Çdo mbështetje për gërryerjen e mëtejshme të demokracisë dhe sundimit të ligjit në vendin tim vetëm do të përshkallëzojë krizën aktuale dhe do të inkurajojë shpopullimin e Shqipërisë”, ishte fraza më acide në letër. /tesheshi.com/
