Ministri i Jashtëm suedez Tobias Billstrom njoftoi se do të largohet nga posti i tij javën e ardhshme pas pothuajse dy vitesh gjatë të cilave vendi i tij tradicionalisht neutral u bashkua me NATO-n.
“Me një përzierje trishtimi dhe krenarie e kam informuar kryeministrin se do të largohem si ministër i Jashtëm në hapjen e parlamentit javën e ardhshme”, njoftoi Billstrom në Platformën X, sipas Reuters.
50-vjeçari, i cili u bë ministër i Jashtëm në tetor 2022, ka thënë se do të largohet nga politika, por nuk ka vendosur se çfarë do të bëjë më pas.
“Ajo që do të bëj më vonë është ende e hapur. Por unë jam vetëm 50 vjeç dhe dua të kontribuoj dhe të punoj shumë në fusha të tjera”, shtoi ai.
Ndryshimi i politikës suedeze
Billstrom, i cili më parë ishte ministër i migracionit, tha se kishte menduar të largohej prej disa kohësh.
Gjatë qëndrimit të tij në krye të diplomacisë suedeze, Suedia finalizoi anëtarësimin e saj në NATO pas një procesi të gjatë për të bindur Turqinë dhe Hungarinë, ratifikimet e të cilave ishin të nevojshme që Suedia të bëhej anëtare.
Kështu, Suedia braktisi dy shekuj mosangazhim ushtarak për t’u bërë anëtare e NATO-s pas pushtimit rus të Ukrainës.
“Ne jemi në situatën më serioze të sigurisë që nga Lufta e Dytë Botërore”, tha ai, duke iu referuar luftës në Ukrainë dhe situatës në Lindjen e Mesme.
Ai i ka uruar fat pasardhësit të tij “të cilit, pra, nuk do t’i mungojnë detyrat”.
“Qeveria nën udhëheqjen e Tobias ka ndryshuar qartë prioritetet e politikës së jashtme suedeze”, njoftoi kryeministri Ulf Kristersson në Instagram. /tesheshi.com/
