Një Kuvend i Gjuhës Shqipe nisi punimet te Pallati Brigadave, me lejtmotivin e ruajtjes së gjuhës. Ndaj, në fjalëmbajtjen e tij me titull “Sfidat e Gjuhës Shqipe në shekullin XXI”, kryeministri Rama u shpreh se, “është e hatashme të përjetosh sesi delirantë dhe injorantë me damkë, për të gjithë ata që vijnë nga betejat për gjuhën shqipe, për të gjithë ata që njohin rrënjët e gjuhës shqipe, për të gjithë ata që jetojnë me respektin e palëkundur për Eqerem Çabejin dhe për të gjithë hapat e hedhur, sot e gjithë ditën proklamojnë gjithfarëlloj tezash ndërkohë që borxhi ynë, borxhi i të gjithëve, borxhi i institucioneve në radhë të parë, bëhet gjithmonë e më i madh dhe duket gjithmonë e më i pashlyeshëm, sepse krahas këtyre zërave, që do të ishin përndryshe për të qeshur, nëse nuk do të jetonim këtë kohë kur barbarizmat në fjalor dhe në sintaksë, nuk do të gjenin shesh për të bërë përshesh dhe hapësirat e paana të rrjeteve sociale, na bën që të jemi të alarmuar dhe të bëjmë çmos për të rezistuar”.
Rama paralajmëroi një fjalor të ri të Shqipes, duke thënë:
“Sot më vjen mirë se si pjesë e kësaj rezistence mund të themi që jemi në momentin historik sa i përket gjuhës së prezantimit të fjalorit të madh të gjuhës shqipe që më në fund përditësohet falë punës monumentale të bërë nën kujdesin e Akademisë së Shkencave. Nesër do prezantohet publikisht edhe drafti i këtij fjalori. Do hidhet në konsultim të gjerë publik dhe do merren opinionet dhe sugjerimet, vërejtjet, kontribute që me gjasë mund ta pasurojnë… E kemi detyrim, të jemi në mbrojtje dhe të mos lejojmë që gjuha të degradojë në pikën e moskthimit”.
Në mbyllje të fjalës së tij, Rama tha: “Dua ta mbyll me një shprehje të albanologut Maximilian Lambertz, i cili thotë se ‘Historia e vërtetë e njerëzimit do të shkruhet vetëm atëherë kur shqiptarët të lejohet të shkruajnë historinë e tyre’. U bënë shumë vite që nuk na pengon askush të shkruajmë historinë tonë. Por është dikush që nuk na lë ta shkruajmë, që jemi ne”. /tesheshi.com/
