Nënkryetarja e Komisionit Evropian në krye të Drejtësisë, Vera Jourova, ngriti shqetësimin për “varësinë morbide” të Evropës nga Kina dhe India për furnizimin me barna dhe pajisje mjekësore gjatë krizës së virusit, raporton AFP.
“Kjo krizë ka zbuluar varësinë tonë morbide nga Kina dhe India për barna”, tha Jourova gjatë një debati në televizionin shtetëror çek.
“Kjo na bën të pambrojtur dhe ne duhet të përgjigjemi me një ndryshim rrënjësor,” shtoi komisionerja çeke, përgjegjës për vlerat ligjore dhe transparencën në Komision.
“Kemi marrë një mësim…”
“Ne do të analizojmë zinxhirët e furnizimit dhe do të përpiqemi të mbështetemi te produktet evropiane. Nga kjo që po ndodh kemi marrë një mësim të madh”, tha Jourova.
Komisioni Evropian duhet të hartojë një plan strategjik mbi këtë çështje deri në fund të muajit dhe pastaj t’ia paraqesë atë Parlamentit Evropian dhe drejtuesve të vendeve anëtare të BE-së, shpjegoi Jourova.
Republika Çeke, si dhe shumë vende anëtare të BE-së, varet nga dërgesa e maskave mbrojtëse nga Kina. /tesheshi.com/
