Një konkurs i rrallë i para dhe tetraplegjikëve – ta thotë Adivija ty se ç`është poezia!

Adivije Hoxha, një vajzë e ardhur nga fshatrat e Burrelit në Arapaj të Durrësit, shumë shpejt do të miqësohet me intelektualë dhe persona të tjerë nga shoqëria, të cilët gëzojnë një status të lartë. Ditë më parë, ajo organizoi dhe moderoi një aktivitet të rrallë: një konkurs poezie për para dhe tetraplegjikë.

Ndonëse aftësitë e saj janë të kufizuara, kjo vajzë 30-vjeçare ka ditur të mposhtë vështirësitë, ndaj miqtë që e rrethojnë kanë çfarë të tregojnë për Adin, siç dhe e thërrasin me përkëdheli e miqësi.

E qeshur dhe shumë miqësore, Adi shëmbëllen me një zonjë e vërtetë e cila kërkon të sfidojë të pamundurën, vështirësitë që i kanë dhënë këtë lloj mjeti për të lëvizur, një karrocë e cila shërben për ata njerëz që kanë pësuar trauma.

Një e tillë pra është kjo vajzë matjane që është bërë shumë e njohur në Durrës prej pesë vitesh, për vargjet e saja poetike, dalë  prej një shpirti plot ndenja të bukura, prej një artisteje të vërtetë.

Dhe ka qenë pikërisht Dita Botërore e Librit, një shkak për të organizuar një konkurs të rrallë, inisitivë kjo e Adit: atë të krijimeve poetike nga rradhët e para dhe tertaplegjikëve.

Ishte një organizim që mbarti shumë emocione, i pari i këtij lloji në vendin tonë, që veç krijimeve poetike të mrekullueshme që solli nga individë të kësaj shtrese, përcolli dhe mesazhe të jashtëzakonshme humaniteti.

Ishin të pranishëm aty dhe figura të njohura letrare dhe publicistike si Moikom Zeqo, apo poeti durrsak Bardhyl Agasi, ish-deputet e politikan, ndërsa kishin ardhur dhe disa personalitete nga Ulqini dhe Kosova.

Të pranishëm ishin dhe përfaqsues të shoqata simotra, që po ashtu morrën mesazhin e një jetë që duhet jetuar me gjithë madhështinë e saj, në mos si fizik për shkak të një ceni të rëndë shëndetësor, por pse jo me shpirt.

Me poezitë që sollën këta artistë të interpretuara nga nxënës të shkollës së mesme të Durrësit, kanë marrë dhe vlerësimet përkatëse, siç ishte ai vendi i parë që nxorri fituese Emrie Krosin të ardhur nga akademia e gazetarisë, me poezinë “Të kam pritur”.

Por një shije jo të mirë aktivitetin, i la mungesa aty e ndonjë përfaqsuesi të ministrisë së linjës, asaj të Çështjeve Sociale. Mungoi aty z/ministrja Bardhylka Kospiri, e cila për më tepër i përket dhe kësaj kategorie. Sipas organizatorëve, ajo ishte e ftuar, por nuk erdhi.

Përgatiti Ahmet Zani – tesheshi.com