Shtimi i vizitorëve nga vendet e Gjirit Persik në Bosnjë-Hercegovinë do të pasohet tani nga një projekt gjigand, që ka për të marrë jetë së shpejti.
Buroj Property Development, një kompani me qendër në Dubai, ka nënshkruar një kontratë prej 5.1 miliardë dollarësh për të ndërtuar një qytet turistik. Mijëra shtëpi, hotele, një qendër tregtare dhe një spital janë pjesë e planit të ndërtimit në Trnovo, rrëzë Bjelasicës, një prej katër maleve përqark Sarajevës.
Ismail Ahmedi, presidenti i kompanisë në fjalë, do të thoshte shpresëplotë në ceremoninë e nënshkrimit të kontratës, “Ky është projekti i jetës sime, dhe shpresoj se do ta përfundojmë atë pa vonesë.”
Ai më tutje do të vinte në pah rëndësinë e Bosnjës si një destinacion turistik: “Unë besoj sinqerisht në këtë, sepse jam i bindur që Bosnja është një destinacion i rëndësishëm global turistik ende i pazbuluar.”
“Buroj Ozone”, siç do të quhet ky qytet turistik, është në plan të nisë nga ndërtimi në pranverën e ardhshme.
Ky “qytet turistik” është i fundit në vargun e projekteve nga kompanitë që vijnë prej Gjirit Persik. Një investues kuvajtian ka ngritur së fundi një resort turistik 30 kilometra larg Sarajevës, dhe pritet që inaugurimi të bëhet sot.
Ndërkaq, një kompani saudite po ndërton një zonë të re banimi në kodrat e Sarajevës, pjesë e së cilës do të jenë rreth 200 vila. /tesheshi.com/
