Nga Blendi Gashi
Ngjan si diçka e bukur dhe romantike në aspektin nacional, ku pra krerë politikë nga Shqipëria e Kosova marrin ndërsjelltazi njerëz nga “matanë kufirit” për t’i patur të besuar të tyre. Ka ndodhur kjo që me Pacollin, i cili morri zëdhënësen dhe një këshilltar nga Tirana, përkatësisht Anduena Llabanin dhe Mentor Nazarkon; me Hashim Thaçin që ka marrë Adri Nurellarin, gjithashtu si këshilltar; apo dhe me Edi Ramën që morri Shkëlzen Maliqin me të njëjtën pozitë. Dhe është sërish Rama që “ka blerë” nga Kosova një tjetër aset, për ta patur si njeriun e afërt sa i përket Doganave dhe Tatimeve…
Ai dështoi të zgjidhej edhe për një mandat në krye të Doganës së Kosovës, pasi nuk ishte i preferuari i kryeministrit Mustafa.
Por as miku i tij, presidenti Thaçi nuk mundi t’i ndihmojë, sado që u mundua të kontestojë zgjedhjen e kryedoganierit të ri Bahri Berisha, duke e quajtur emërimin e tij të paligjshëm.
Fjala është për Lulzim Rafunën i cili karrierën do e vazhdojë në Shqipëri, pasi është emëruar këshilltar për Dogana e Tatime i kryeministrit Edi Rama.
Në këtë emërim besohet të ketë ndikuar presidenti Thaçi dhe kompania e fuqishme “Devolli”, konkretisht vëllezërit Shkëlqim e Blerim Devolli, të cilët kanë raporte të mira me Ramën. Kjo u vërtetua edhe me vizitën që ky i fundit e bëri më 22 mars të vitit 2014-të në kompaninë në fjalë.
Pavarësisht kush mund të jetë ndërmjetësuesi, konsiderohet që Rama krahë vetes ka marrë një profesionist, pasi Rafuna i takon gjeneratës së parë të oficerëve doganorë të çertifikuar në vitin 2000.
Por emri i Rafunës gjatë tre viteve si kryedoganier, jo pak është përmendur në media edhe për keqpërdorime të ndryshme; gjë që mesa duket duket nuk ka ndikuar tek Rama.
Rafuna ka qenë edhe më herët i ftuar që të punojë pranë Kryeministrisë shqiptare, por që nuk ka pranuar.
Rafuna i afërt me PDK-në; ja për ç’afera u akuza si kryedoganier
Lulzim Rafuna njihet si njeri i afërt me PDK-në. Nga pozita e ish-drejtorit të Doganave më 2013 u bë drejtor falë përkrahjes që kishte nga ish-ministri i Zhvillimit Ekonomik, Besim Beqaj.
Gjatë tre viteve si kryedoganier emri i Rafunës u përfol në media për afera të ndryshme.
Ai për pesë orë u intervistua nga policia si i dyshuar për keqpërdorim të detyrës zyrtare, konkretisht për veprën– lirim jo ligjor i automjetit personal nga taksat doganore.
Mediat publikuan të dhëna nga Qendra për Regjistrimin e Veturave, ku treguan se Rafuna në mënyrë kundërligjore e ka liruar veten e tij prej pagesës së doganës për një automjet të blerë, gjë që e mohoi.
Po ashtu, Rafuna gjatë mandatit të tij është raportuar se ka bërë favorizime në emërime, ku ka avantazhuar njerëz të afërt me PDK-në, për çka vartës të tij kërcënuan e grevë të përgjithshme.
Pasuria e Rafunës
Rafuna si drejtor i Doganave në vitin 2016-të në Agjencinë Kundër Korrupsion ka deklaruar pasuri tejet të majme. Një shtëpi në vlerë prej 160.000 euro, si dhe një lokal prej 200 metra katror që e ka vlerësuar zero euro. Ka deklaruar se posedon tri automjete në vlerë prej 20 mijë euro, pagën e tij mujore mbi 1500 euro dhe 600 euro të hyra nga qiraja e një lokali. /tesheshi.com/
