Kolonizimi i pjesës veriore të Mitrovicës nuk ka mbaruar ende, dhe për këtë proces po punojnë autoritetet nga Serbia që po ndërtojnë shtëpi për serbët në lagjet shqiptare.
Në lagjen “Kroi i Vitakut” të pjesës veriore të qytetit të ndarë, synohet të sillen serbë, të cilët nuk kanë jetuar asnjëherë në atë pjesë, ndërkohë që shqiptarëve nuk u është lejuar t’i rindërtojnë shtëpitë e djegura e të rrënuara gjatë luftës.
E gjithë kjo po ndodhë me lejen e komunës së Mitrovicës, një nga zgjatimet e pushtetit serb në Kosovë. Rreth 300 shtëpi të shqiptarëve në lagjet veriore të Mitrovicës ende janë gërmadha, pasi ndërtimi i tyre nuk lejohet nga Komuna Veriore e Mitrovicës, e cila udhëhiqet nga kreu i Listës Serbe, Goran Rakiq.
Shumë shqiptarë të lagjeve veriore, të dëbuar nga veriu i Mitrovicës në vitin 2000, edhe më tutje jetojnë si refugjatë në jug të qytetit të Mitrovicës, madje në kushte të rënda banimi.
Ata shprehen të shqetësuar nga ndërtimi i shtëpive për serbët, të bindur se ato po ndërtohen për të sjellë njerëz nga Serbia që kurrë nuk kanë jetuar në atë pjesë.
Kujtojmë se në pjesën veriore të qytetit deri tani nuk është lejuar që asnjë shqiptar ta rindërtojë shtëpinë ose të ndërtojë shtëpi të re në pronën e vet. /tesheshi.com/
