Turqia dhe vendet e tjera duhet të vazhdojnë të bisedojnë me Rusinë për të ndihmuar në përfundimin e luftës në Ukrainë, tha sot zëdhënësi presidencial turk, duke shtuar se Kievit i duhet më shumë mbështetje për t’u mbrojtur.
“Nëse të gjithë i presin urat me Rusinë, atëherë kush do të flasë me ta në fund? Ukrainasit duhet të mbështeten me të gjitha mjetet e mundshme në mënyrë që ata të mund të mbrohen… por çështja e Rusisë duhet të dëgjohet në një mënyrë ose në një tjetër,” tha Ibrahim Kalin nga Forumi Ndërkombëtar i Dohas.
Kujtohet se presidenti i Ukrainës, Volodymyr Zelensky, dukshëm i irrituar, kërkoi nga vendet e Perëndimit të shtunën të ofronin një pjesë të vogël të arsenalit të tyre dhe pyeti nëse kishin frikë nga Moska.
Disa vende kanë premtuar se do të dërgojnë raketa antitank dhe kundërajrore, si dhe armë më të lehta. Megjithatë, Zelensky theksoi se Kievit i duhen tanke, avionë luftarakë dhe sisteme të armëve kundër anijeve. “Këto kanë partnerët tanë dhe vetëm mbledhin pluhur aty ku janë. E gjithë kjo nuk është vetëm për lirinë e Ukrainës, por për lirinë e të gjithë Evropës”, tha Zelensky në një video-mesazh të shtunën vonë në mbrëmje. /tesheshi.com/
