Shoqata për krime lufte “Gjakova 98-99” ka dorëzuar në Prokurorinë Speciale të Kosovës një kallëzim penal në sektorin e krimeve të luftës kundër gjeneralit Bozhidar Deliç, ish-komandant i Brigadës 549 të Motorizuar të Ushtrisë Jugosllave gjatë luftës në Kosovë. i cili së fundi u zgjodh nënkryetar i Kuvendit të Serbisë.
Përfaqësuesja e Shoqatës për Krime Lufte “Gjakova 98-99”, Shkëndije Hoda tha pas kallëzimit penal se presin rezultate konkrete.
Ajo tha se kanë dorëzuar gjithsej tri kallëzime penale, të bashkangjitura me dokumentacion faktik.
Ankesa penale përfshin identifikimin e autorëve të krimit përmes dëshmive të civilëve shqiptarë në kohën kur ata u ndaluan apo keqtrajtoheshin nga ushtria dhe policia serbe.
Gjok Sokoli nga kjo shoqatë thotë se dokumentet e dorëzuara në Prokurori dëshmojnë se krime nuk janë kryer vetëm nga policia serbe, por edhe nga ushtria serbe.
“Ne kemi informacione të mjaftueshme për këtë kriminel lufte dhe i kemi dorëzuar në Prokurori. Ka qindra dëshmi, besoj se ky person (Deliç) do të bjerë në duart e Hagës”, tha ai.
Sokoli thotë se Deliç ishte nga një fshat afër Gjakovës dhe se ka marrë pjesë në këto krime si civil.
Deliç u lind në Lugbunar të Gjakovës, ku kaloi fëmijërinë, derisa u shpërngul në Beograd, ku kreu akademinë ushtarake.
Ai disa herë ka qenë deputet, ndërsa në fillim të gushtit ka marrë postin e nënkryetarit të Kuvendit të Serbisë për herë të dytë.
Edhe presidentja Vjosa Osmani tha se ai ishte komandant i një brigade ushtarësh “që masakruan mijëra kosovarë”. /tesheshi.com/
