Pozitat e Rafa Benitezit në stolin e Realit të Madridit po lëkunden prej kohësh. Tekniku spanjoll është i vetëdijshëm që po luan kartat e tij të fundit, dhe një gabim i radhës mund t’i kushtojë shkarkimin.
Trajneri i përfaqësueses së Italisë, Antonio Konte, mund ta marrë shumë lehtë drejtimin e skuadrës mbretërore të Realit të Madridit, pasi emri i tij është ndër më të përmendurit për ta zëvendësuar Benitezin në rast shkarkimi. Konte ka kaluar një jetë me Juventusin, ekipin gjigant italian, si futbollist dhe si trajner. Vitet e fundit ai e udhëhoqi zonjën e vjetër drejt rikthimit te titujt kampion në Serinë A.
Një tjetër emër që po përmendet në tryezën e presidencës madrilene është po ashtu një italian, Fabio Kapelo, një njohje e vjetër në mjedisin e Realit. Aktualisht ai është i papunë pas lënies së kombëtares ruse, dhe është i gatshëm t’i marrë në dorë frenat e skuadrës të cilin e drejtoi edhe në të kaluarën, me ç’rast pati fituar kampionatin spanjoll.
Presidenti i klubit, Florentino Perez, e ka shprehur haptazi mbështetjen për trajnerin aktual, Rafa Benitezin, mirëpo gjërat në terren duken ndryshe. Tashmë po mendohet për një trajner të ri, e madje ai mund të emërohet para vitit të ardhshëm. /tesheshi.com/
