Muharrem Rama, ose ndryshe “Doktor Rrema” siç njihet në jetën urbane e rurale të Dibrës, kandidati pra i PS-së për bashkinë “post-Shuke”, siç nuk ka lidhje me Edi Ramën në kuptimin farefisnor të fjalës, nuk ka lidhje as me Xhametajt e Tiranës, prej nga doli Qomili i famshëm, kreu i të ashtëquajturve “dumbabistë”.
Por që një ironi fati, krejt e lezetçme, e bën atë të jetë djali i Haxhi Qamilit. Dhe ja pse.
Muharrem Rama është djali i Qamil Ramës, një ish-funksionar i kohës së komunizmit në Peshkopi, si drejtor në disa ndërmarrje e mbajtës i disa posteve ekzekutive, por nga ajo racë partiakësh të kohës që lum demokracia po t’i kish patur: njeri korrekt, i moralshëm dhe pa asnjë zullum ideologjik mbi fate njerësish.
Mbi të gjitha edhe pak fetar, gjë që në vitet e ndryshimeve të sistemit, i pati sjellë dhe kokëçarje politike nga sishokë të partisë. Më vonë, ai do e shpaloste hapur besimin e tij, derisa në vitin 2009 merr dhe titullin Haxhi, pasi kryen haxhillëkun në Mekë. Pra, ironikisht quhet edhe Haxhi Qamili.
P.S. Në shoqërinë shqiptare, kjo emërtese që i mvishet çdo njeriu që ka kryer haxhillëkun duke fituar legjitimitet mbi emrin dhe mbiemrin klasik, ka humbur prej kohësh, ndryshe nga Kosova apo shoqëria shqiptare e Maqedonisë, tek të cilat rruhet ende kjo traditë, ku tjetri thirret si “haxhi filani”, sapo kryhen haxhillëkun e më pas. /tesheshi.com/
