Zëdhënësja e PD-së, ende e papërjashtuar nga Rithemelimi, Ina Zhupa, kujtoi të ndjerin Pjetër Arbnori. Por jo vetëm kaq, ajo ofron dhe një propozim.
“Më 4 prill 1992 nisi sesioni i kuvendit parlamentar ku për herë të parë Partia Demokratike kishte shumicën me 92 vende dhe do të qeveriste vendin.
Po në këtë ditë, është dita e parë që ka drejtuar Pjetër Arbnori seancen hapëse si më i vjetri i deputetëve dhe më pas do e drejtonte si kryetar i Kuvendit!
Përkujtoj këtë ditë si homazh ndaj Pjetër Arbnorit, ‘Mandelës së Ballkanit’ dhe si motiv që PD të kthehet me votën e lirë në shumicë parlamentare sa më shpejt.
Sot në këtë 30 vjetor, propozoj që salla e mbledhjeve të grupit në PD të marr emrin e tij dhe të quhet salla ‘Pjetër Arbnori’ për të nderuar figurën e tij dhe per tu frymëzuar nga modeli i tij në politikë”, shkruan Zhupa.
Është kjo diçka e rrallë në PD, një kujtesë për më të djathtin që ka patur PD-ja në radhët e saj, njëherësh dhe më të persekutuarin, si dhe më etikun e saj në politikë.
Ndërkohë, Zhupa shënon kështu idenë e dytë të saj. Të parën e dha pak ditë më parë me një propozim disapikësh për bashkim.
Nuk ia ka marrë kush në konsideratë në partinë e saj, në këto raste thuhet se “ajo e bëri të vetën”. Nuk dihet nëse do merret në konsideratë dhe ideja për Arbnorin, emrin e tij në sallën e grupit. /tesheshi.com/
