Ministrat e jashtëm të BE mbështesin idenë e krijimit të një mekanizmi që do t’i lejonte Unionit të vendosë sanksione për shkeljet e të drejtave të njeriut në të gjithë botën.
Kjo do t’i lejonte BE të vendosë kufizime në udhëtime dhe ngrirje të pronave të individëve dhe personave juridikë përgjegjës për shkeljet e të drejtave të njeriut.
“Me iniciativën e disa anëtarëve, ne kemi rënë dakord të fillojmë përgatitjet për një sistem global të sanksioneve për shkelje serioze të të drejtave të njeriut,” tha Përfaqësuesi i ri i Lartë për Politikën e Jashtme dhe të Sigurisë Josep Borrell, pas takimit në Bruksel.
Më parë, ministri i Jashtëm gjerman Heiko Maas mbështeti iniciativën, duke theksuar se BE duhet të diktojë me “pasoja” kur ndodhin shkelje të të drejtave të njeriut.
Ministrat e jashtëm të BE diskutuan gjithashtu marrëdhëniet me Afrikën, si pjesë e përgatitjeve për samitin e BE-Afrikës së vitit të ardhshëm.
Para fillimit të takimit, shumica e ministrave të Jashtëm morën pjesë në një mëngjes pune me diplomatët e Maqedonisë Veriore dhe të Shqipërisë.
Takimi u mbajt me iniciativën e Greqisë, për të ndihmuar në gjetjen e një zgjidhjeje për hapjen e bisedimeve të pranimit me dy vendet, e cila u bllokua në tetor nga Franca, Hollanda dhe Danimarka.
Para takimit, Borrell u dërgoi një letër të gjithë ministrave të Jashtëm të shteteve anëtare, në të cilat ai bëri thirrje për një politikë të jashtme më të fortë të BE-së. /tesheshi.com/
