Nuk njihet si i urtë por po shfaqet si më i urti deri më tani në një tollovi të brendshme në PD, me trajtat e një përplasjeje të ashpër Berisha – Basha, ndjekur nga kampet respektive.
Edi Paloka, i përmbajtur deri më tani, me qëndrime të ekuilibruara, ka tentuar të ulë tensionet, duke bërë negociatorin në atë që mund të quhet “kriza e firmave”.
Në rolin e kreut të Këshillit Kombëtar, Paloka tha se ka propozuar zgjidhjen e tij për ngërçin dhe “misterin” e 4200 firmave.
Paloka ka propozuar se nga të dyja palët mund të caktohet një person që të shkojnë në zyrën e tij dhe të verifikojnë një nga një të gjithë formularët.
“Do i propozoja dhe i kam propozuar palëve një zgjidhje që të ishte shteruese dhe të hiqet çdo dyshim që ka mes palëve.
Statuti nuk parashikon procedurë dhe palët nuk kanë besim. Të caktojnë nga një person dhe njerëzit të merren.
Për njërën palë Ivi Kaso dhe palën tjetër Ervin Minarolli personi që merret në sekretariat.
Po bëj propozim që palët të ulen dhe të eliminojnë hijet e dyshimit. Të ecim dhe të çojmë procesin para. Të vijnë në zyrën time të bëjnë verifikimet një nga një për 4200 firmat që janë në zyrën time. Pa vazhduar me sulme dhe dyshime”. /tesheshi.com/
