Kishte një tumor shumë të rrallë që i rrethonte pjesën e qafës dhe që me siguri do ta kishte penguar të merrte frymë duke e mbytur, ndaj një vajzë e vogël, ende në barkun e së ëmës, është detyruar të vijë në këtë jetë me operacion cezarian në spitalin Sant’Anna të Torinos në Itali dhe është operuar menjëherë, edhe pse mbante ende kordonin ombelikal të lidhur me të ëmën.
Bëhet fjalë për një ndërhyrje kirurgjikale avanguardë të kryer me të ashtuquajturën teknika Exit, e përdorur për herë të parë në Sant’Anna në Torino, e cila ishte teknika e vetme e aftë për të shpëtuar jetën e të voglës. Fëmija kishte një problem shumë të rrallë të krijuar që në ngjizje, që ka të bëjë me një copë mishi që i rrethonte qafën dhe nuk e lejonte të merrte frymë.
Kështu nëna u detyrua të lindë në javën e 31-të, ndërsa e vogla nuk u largua nga kordoni ombelikal në mënyrë që mjekët të mos e vendosnin në reanimacion dhe me tuba, pasi në të kundërt ajo do të kishte ndërruar jetë brenda pak minutash.
Teknika është tepër unike dhe lejon një akses të gjerë në rrugët e frymëmarrjes së fetusit, pasi kalimi i oksigjenit bëhet nëpërmjet qarkullimit nga placenta në mitër. I sapolinduri nxirret pjesërisht jashtë mitrës së nënës për aq kohë sa duhet për të bërë ndërhyrjen, çka mund të zgjasë disa minuta.
Sapo kanë garantuar frymëmarrjen falë teknikës së veçantë, mjekët kanë hequr masën e mishit që i rrethonte pjesën e qafës nga mjekra në gjoks dhe nga njëri vesh në tjetrin, e cila peshonte rreth 300 gramë, ndërsa vetë vajza peshon vetëm 1.6 kilogramë. Vajza është shtruar në terapi intensive në spitalin e të sapolindurve në Sant’Anna dhe merr frymë e ushqehet në mënyrë të pavarur. Aktualisht ajo ndodhet në kushte shumë të mira shëndetësore./tesheshi.com/
