Kryeministri Edi Rama pozoi me drejtuesen e re të spiunazhit shqiptar, gruan nga Kosova që do drejtojë SHISH-in, përzgjedhur prej tij dhe dekretuar një ditë më parë nga presidenti Begaj.
Në ceremoninë e mbajtur pranë institucionit të inteligjencës shqiptare, ishin të pranishëm edhe ministri i Brendshëm Bledi Çuçi, ministri i Drejtësisë Ulsi Manja si dhe ministri i Mbrojtjes, Niko Peleshi.
“Sapo mbaruam prezantimin në institucion të drejtores së re të Shërbimit Informativ të Shtetit, Vlora Hyseni, e cila u dekretua dje nga Presidenti i Republikës”, shkruan Rama në një postim në rrjetet sociale.
Vlora Hyseni vjen në këtë post pas largimit të Helidon Bendos, i cili u emërua në detyrën e drejtorit të Shërbimit Informativ të Shtetit në datën 5 nëntor 2018.
Hyseni u propozua nga kryeministri Rama, i cili ka theksuar se “përgatitja e spikatur, eksperienca e krijuar në vite dhe respekti që Hyseni gëzon në komunitetin ndërkombëtar të inteligjencës, përbëjnë një garanci të plotë për reformimin e mëtejshëm të shërbimit inteligjent shqiptar”.
Kjo është hera e parë që inteligjenca shqiptare drejtohet nga një grua, për më tepër kosovare.
Duhet kujtuar se me zgjedhjen e Vlora Hysenit në krye të SHISH-it, në një post tjetër delikat, kreministri Rama ka bërë një tjetër akt të faktorizimit të elementit kosovar në qeverisjen e tij.
Një kosovare me emër patriotik në krye të shërbimeve inteligjente shqiptare, ka dhe një simbolikë të fuqishme në kontekst të zhvillimeve ballkanike, ku shërbimet serbe janë gjithnjë kërcënuese. /tesheshi.com/
