Spanja është shpërblyer për këmbënguljen e saj në kërkimin e golit në ndeshjen ndaj Çekisë, të vlefshme për grupin D në Euro 2016.
Një zotërim i plotë i lojës nga spanjollët, në 72 për qind të saj, me presionin që do të bëhej më i theksuar me nisjen e pjesës së dytë.
Alvaro Morata do të kishte dy raste të mira në pjesën e parë, por nuk do të arrinte të finalizonte, po ashtu si dhe në 45 minutat e dyta.
Freskimi i skuadrës në pjesën e fundit të lojës, me tre zëvendësime në mesfushë e në sulm, do t’i bënte më të zhdërvjellët spanjollët, që nuk reshtën së kërkuari portën kundërshtare.
Iniesta dhe David Silva do të ishin truri i skuadrës, por më spikatësi ishte sigurisht mesfushori i Barcelonës. Nga këmba e mendimi inteligjent i të cilit do të vinte dhe goli i fitores. Një top i Iniesta-s për Pique-n në kurrizin e mbrojtësve çekë do ta nxirrte të zbuluar qendërmbrojtësin spanjoll, që nuk do ta kishte të vështirë ta dërgonte topin në rrjetë në minutën e 87-të. Një skemë tipike e Barcelonës, e realizuar mjeshtërisht në takimin e Spanjës ndaj Çekisë.
Lojtarët çekë do të kujtoheshin në ato fragmente të mbetura të lojës të barazonin. Vendimi i Del Bosque-s për të patur De Gea-n në portë, e jo Casillas-in, doli i qëlluar, pasi portieri i Mançester Junajtedit priti një top të vështirë në minutën e 92-të. Darida do të kishte shënuar me siguri nëse De Gea nuk do të ishte gjendur në pozicion.
Ndeshja e parë e kësaj të hëne u mbyll me fitoren 1-0 të spanjollëve, që e kryesojnë tanimë grupin D së bashku me Kroacinë, me nga tre pikë. /tesheshi.com/
