Kreu demokrat Basha nuk lëvizi aspak nga qëndrimi i tij për zgjedhje pa Ramën në krye të qeverisë, edhe pas një takimi në zyrën e tij me nënkryetaren e grupit parlamentar CDU/CSU për Europën, Katja Leikert.
Ardhja e kësaj të fundit në Tiranë, është parë si një përpjekje e radhës nga ana e Berlinit për të negociuar krizën shqiptare, tashmë që po troket shtatori. Por, së paku formalisht, Basha nuk luan nga pozicioni i tij.
“Zgjidhja e kësaj krize kalon përmes zgjedhjeve të lira e të ndershme, çka do të thotë një qeveri tranzitore pa Edi Ramën dhe zgjedhje të parakohshme parlamentare, në një ditë me zgjedhje kushtetuese lokale”, tha kryeopozitari, duke paralajmëruar vijimin dhe të protestave.
“Opozita ka vazhduar gjatë gjithë verës aksionin e saj, përfshirë edhe protestat, dhe do të vijojë të bëjë të njëjtën gjë”, tha Basha. /tesheshi.com/
