Andrea Beloti mund të jetë pasuesi i Kylian Mbape tek Monako. Klubi francez ka shprehur gadishmërinë për të paguar klauzolën 100 milion që presidenti i Torinos ka vënë për shënuesin më të mirë të Seria A sezonin e kaluar.
Sipas mediave vendase, “llogaritë” për të sjellë Belotin në Francë, lidhen me ofertën e PSG për Mbape. Nëse Monako shet Mbape për 180 milion euro tek kryeqytetasit dhe pranon të shkëmbejë Lukas Moura me Fabinjon, plus 20 milion të tjera, atëherë me gjysmën e këtyre parave, nuk do ta kishte të vështirë të paguante kushtin për blerjen e “gjelit”
Andrea Beloti, siç është nofka e tij. Në këtë mënyrë, kur u mendua se sulmuesi italian do të vazhdonte të paktën edhe për 1 vit të luante për Torinon, e kur trajneri Mihaloviç “mori frymë i lehtësuar” që Chelsea, Manchester Junajted dhe Milan, nuk e arritën dot sulmuesin, sepse nuk plotësuan kushtin 100 milion euro, del në skenë një ofertë e re, e plotë dhe me tetë zero pas njëshit.
Edhe pse po afrohet drejt fundit, nga merkatoja e verës, me sa duket, nuk kemi parë e dëgjuar asgjë akoma…siç ka thënë një ish-basketbollist. /tesheshi.com/
