Një gazetë në pronësi të qeverisë e ka kritikuar çuditërisht përfshirjen e Iranit në konfliktin sirian, posaçërisht në Halep. Gazeta iraniane e ka quajtur qytetin në veri të Sirisë, ku edhe përplasja ushtarake mes palëve të përfshira është më e madhe, si xhehennem për trupat e Iranit, diçka që nuk është pritur aspak mirë nga zyrtarët apo nga organet e tjera mediatike.
Raportimi i gazetës Iran e cilëson Halepin “xhehennemin e trupave iraniane, të milicive e të forcave që luftojnë përkrah tyre”. Irani përmendet në artikull si një “pjesëmarrës kryesor” në rrethimin e Halepit.
Artikulli është kritikuar nga zyrtarë të lartë shtetërorë e nga organe të ndryshme mediatike. Drejtuesi i komitetit kulturor në parlamentin e vendit e quajti artikullin një ndihmë për grupet e opozitës në Siri.
E përditshmja iraniane Vatan Emruz botoi në faqen kryesore një artikull të titulluar “Iran-i kundër Ruhanit”, ku thuhej mes të tjerash se raportimi i Iran-it minon sigurinë kombëtare të vendit. Po ashtu është kritikuar publikimi nga Iran-i i fotografisë së Umran Dakneshit, fëmijës që u bë i famshëm për pamjen e tij tërë gjak e pluhur ndërsa qëndronte i hutuar e i pazë në një autoambulancë.
“Kjo fotografi u shkon më për shtat mediave të huaja armiqore ndaj Iranit, që gjithashtu e publikuan atë për ta drejtuar nga Teherani presionin mediatik dhe politik,” thuhet në artikullin e Vatan Emruz-it.
Irani dhe aleatët e tij, përfshirë Hezbullahun libanez, po luftojnë në Siri në mbështetje të regjimit të Beshar Esadit. Duke qenë mbështetësi kryesor i regjimit sirian në rajon, Irani lejoi jo shumë kohë më parë dhe uljen e ngritjen nga bazat e tij të avionëve luftarakë rusë që bombardojnë në Siri. /tesheshi.com/
