Kryetari i bashkisë së Kievit, Vitali Klitschko i ka kërkuar Papa Françeskut që të udhëtojë në kryeqytetin ukrainas në mes të pushtimit rus, duke argumentuar se prania e kreut të Kishës Katolike Romake mund të jetë vendimtare për t’i dhënë fund luftës dhe për të shpëtuar jetë.
Letra e kryebashkiakut dhe ish-kampionit botëror të boksit drejtuar Papa Françeskut pasoi ftesat e drejtuara më parë nga Kryepeshkopi i Kishës Katolike Greke të Ukrainës dhe ambasadori i Ukrainës në Vatikan.
Një deklaratë e Vatikanit tha se Papa Françesku kishte marrë letrën, e cila u dërgua më 8 mars. Selia e Shenjtë thekson se Papa po lutet për popullin ukrainas, por nuk ka asnjë referencë për një ftesë apo një udhëtim në Kiev.
“Ne besojmë se prania e Papës në Kiev është një ‘çelës’ për të shpëtuar jetë dhe për të hapur rrugën për paqen në qytetin tonë, në vendin tonë dhe më gjerë,” shkroi Vitali Klitschko në një letër drejtuar kreut të Kishës Katolike Romake.
Ai tha se Kievi ishte i gatshëm të ofronte çdo ndihmë të nevojshme. Në rast se vizita e Papa Françeskut nuk ishte e mundur, kryebashkiaku i Kievit propozoi një telekonferencë me pjesëmarrjen e presidentit ukrainas Volodymyr Zelensky, e cila do të transmetohej drejtpërdrejt ose video.
“Ne ju bëjmë thirrje, si udhëheqës shpirtëror, të tregoni dhembshurinë tuaj, të qëndroni pranë popullit ukrainas, duke përhapur me ne thirrjen për paqe”, tha Klitschko në letër.
Përmbajtjen e letrës e ka konfirmuar edhe zëdhënësi i kryetarit Klitschko.
Kryepeshkopi i Kishës Katolike Greke të Ukrainës, Sviatoslav Shevtsuk dhe ambasadori ukrainas në Vatikan, Andriy Yuras, e kishin ftuar Papën muajin e kaluar, por para fillimit të pushtimit rus.
Deklarata e Vatikanit i bëri jehonë fjalëve të Papa Françeskut, i cili hodhi poshtë pretendimet e Moskës për të justifikuar pushtimin: “Përballë barbarisë së vrasjes së fëmijëve, njerëzve të pafajshëm dhe civilëve, asnjë arsye strategjike nuk është e vlefshme. Gjithçka që duhet bërë është të ndalet kjo ofensivë ushtarake e papranueshme përpara se qytetet të kthehen në varreza”.
Rusia thotë se veprimet e saj nuk kanë për qëllim pushtimin e territoreve, por “çmilitarizimin” e Ukrainës. Moska e quan pushtimin një “operacion special ushtarak”.
Më 6 mars, Papa Françesku hodhi poshtë pa mëdyshje këtë term, duke theksuar se ai nuk mund të konsiderohet “thjesht një operacion ushtarak”, por një luftë që ka shkaktuar “lumenj gjaku dhe lot”. /tesheshi.com/
