Një ngjarje e rëndë dhe gati e pabesueshme ka ndodhur në Shënavlash të Durrësit, ku një 19-vjeçare, studente për Biznes në Tiranë, ka pohuar vrasjen e të atit, 49 vjeç, me pretendimin se ai ka dashur ta fejojë kundër dëshirës së saj.
Viktima, Pëllmbu Meta, është gjendur i varrosur pranë banesës, në kasollen e bagëtisë së familjes. Prej 10 ditësh ai konsiderohej i zhdukur. Ka qenë e bija, Hygerta Meta, e cila i ka rryfer Policisë krimin e rëndë, gati të pabesueshëm, të denjë për skenare filmash me fantazi të çartur e mizore. Ajo ka thënë se të atin e ka qëlluar me një pistoletë, të cilën më pas e ka hedhur në sektorin “Rinia” në Durrës. Atje ajo ka lënë edhe mjetin e të atit për të humbur gjurmët.
Megjithatë, hetimet vijojnë për të zbuluar detaje të tjera të këtij krimi, si fjala vjen bashkëpunëtorë të mundshëm, pasi duket e pabesueshme, edhe për fqinjët, që vajza ta ketë vrarë të atin në formën që ajo e ka rrëfyer. Ata kanë dhënë vlerësime positive si për viktimën, të bijën dhe përgjithësisht familjen Meta.
Për këtë ngjarje të rëndë, ministri Balla tha nga Korça se beteja me krimin në familje nuk mund të fitohet vetëm me angazhimin e policisë, por të gjithë shoqërisë, përfshirë edhe mediat.
“Viti 2023 ka qenë një vit me ngjarje të rënda të krimit brenda familjes dhe po ashtu një numër i rritur i dhunës në familje kjo dhe për shkakun se policia është munduar të identifikojë të gjitha rastet që kemi pasur sinjalizime. Kjo betejë nuk është një betejë që mund ta fitoj vetëm Policia e Shtetit. Policia e Shtetit është aty për të bërë ndërhyrjen e parë dhe natyrshëm për të vendosur para ligjit dhunuesin, por kjo është diçka që unë mendoj duhet t’i bëjmë një apel gjithë shoqërisë tonë. Lufta kundër dhunës seksuale, dhunës me bazë gjinore nuk është diçka që zhvillohet dy javë kur mblidhen gjithë shoqatat e këtij vendi për të sensibilizuar. Unë mendoj që kjo duhet bërë çdo ditë dhe ju mediat keni një meritë të veçantë sikurse keni dhe një përgjegjësi të madhe për të sensibilizuar dhe për ta bërë shoqërinë sa më të bashkuar kundër këtij fenomeni të papranueshëm”.
