Nga Ylli Pata
Edi Rama nis “katharsin” e tretë të Partisë Socialiste. Burime të tesheshi.com bëjnë të ditur se para kongresit të janarit, lidershipi socialist ka kryer një shkartisje të fortë deputetësh që i ka zhvendosur nga njëri qark në tjetrin. Aktualisht vetëm Edi Rama dhe Gramoz Ruçi janë drejtues të qarqeve të vendit, ndërkohë që asnjë prej udhëheqësve të 12 zonave zgjedhore të dalë nga votimet e 23 qershorit 2013 nuk rezulton më në kryelistë.
Por ajo më e rëndësishmja është se nuk janë lëvizur vetëm kapolistat por edhe deputetët e tjerë, duke krijuar një zhvendosje thuajse totale të tyre. Ende nuk është zgjidhur çështja e qarkut të Dibrës dhe Kukësit ku mësohet se Rama do të bëjë gjithashtu një ndryshim nga e para.
Emrat
Në qarkun e Shkodës, drejtues ka qenë më 2013-n Tom Doshi, ndërkohë që aktualisht është komanduar shefi i diplomacisë, Dirmir Bushati.
Në qarkun e Kukësit ka qenë Vexhi Muçmata, ndërkohë që situate është e paqartë dhe do të pësojë një ndryshim rrënjësor.
Në qarkun e Dibrës do të jetë Ulsi Manja si kryelistë ndërsa nuk dihet se si do të veprohet me ministrin aktual të Financave Shkëlqim Cani, i cili ka drejtuar fushatën në vitin 2013.
Në qarkun e Lezhës, në krye të listës së deputetëve ka qenë ministrja aktuale e Mbrojtjes Mimi Kodheli, por tani ajo nuk është kryeparlamentare dhe drejtimin e PS-së në qark, pas traumës së largimit të thuajse të gjithë listës e ka marrë ministrja e Arsimit, Lindita Nikolla.
Në qarkun e Tiranës, nuk do të ketë asnjë ndryshim dhe kreu i PS-së për kryeqytetin do të vazhdojë të mbetet ministri i Brendshëm, Saimir Tahiri. Por këtu do të kemi një ndryshim të konsiderueshëm deputetësh që do të hiqen nga kryeqyteti dhe do të zhvendosën në zona të tjera apo do të hiqen fare.
Për qarkun e Durrësit pritet që të mos jetë Blendi Klosi njeriu që do të drejtojë punën e PS-së dhe sipas gjasave nuk do të drejtojë listën. Burime pranë selisë rozë bëjnë të ditur se ka gjasa që këtë vend ta marrë gazetari Alfred Peza, që në zgjedhjet e shkuara ka qenë parlamentar i qarkut të Elbasanit.
Pikërisht në këtë qark sipas të gjitha gjasave nuk do të jetë Ben Blushi, i cili ka shumë mundësi të zhvendoset në kryeqytet, dhe në qarkun e “zemrës së vendit” të emërohet një emër krejt i ri që pritet të bëhet publik në Kongresin e Janarit.
Qarkun e madh të Fierit do ta vazhdojë ta drejtojë numri dy i PS-së, Gramoz Ruçi, ndërsa Vlorën do të vazhdojë ta ketë në komandë Kryeministri Edi Rama.
Gjirokastra mbetet sërish enigma e madhe, pasi Veliaj që ka qenë në zgjedhjet e 2013-s aktualisht është zgjedhur kryebashkiak i Tiranës.
Ka pasur propozime që zona e jugut të qytetëruar t’i jepet ose një figure të re me reputacion, ose dy prej “senatorëve”: Arta Dades apo Bashkim Finos.
Për qarkun e Korçës nuk ka asnjë dilemë: do të jetë Niko Peleshi, numri dy i qeverisë shqiptare që do të dërgohet të komandojë punën politike në zonën ku ka drejtuar për dy mandate si kryetar i bashkisë së Korçës.
Në Berat pritet një rikthim i Artan Lames, i cili nuk arriti të zgjidhet dot si deputet ngaqë LSI-ja mori dy parlamentarë në qark, por ekziston edhe ideja që Lame të kandidojë në zonat ku po udhëheq me rezultate planin e Ramës për legalizimin e banesave informale.
Kongresi
Në janar Kongresi i PS-së do të zgjedhë Asamblenë e re të partisë që pritet të jetë 45 përqind komplet e re dhe kryesinë, e cila ka gjasa të ketë brenda saj pak ose aspak nga “senatorët” aktualë.
PS do të bëjë ri-regjistrimin nga e para të anëtarësisë, pasi ka ndodhur këto vite një zhvendosje drejt LSI-së dhe kjo kërkon verifikim. /tesheshi.com/
