Presidenti amerikan Joe Biden është ende në gjendje të mirë për kryerjen e detyrave të tij dhe është në gjendje të përmbushë plotësisht të gjitha përgjegjësitë pa përjashtim dhe pa përshtatje, sipas raportit të mjekut pas ekzaminimit sistematik vjetor të Bidenit në spitalin ushtarak “Walter Reed” Maryland.
Në një memorandum të publikuar nga shërbimi për shtyp i Shtëpisë së Bardhë, thuhet se Biden është “një burrë i shëndoshë, aktiv, i fortë 81-vjeçar, i cili është ende i aftë të kryejë me sukses detyrat e presidentit, të cilat, ndër të tjera, i referohet edhe detyrave të kreut të shtetit dhe komandantit të përgjithshëm”.
Mjeku i Bidenit, Kevin O’Connor, thekson në raport se kushtet mjekësore të presidentit amerikan janë “të qëndrueshme dhe të kontrolluara mirë”, duke përfshirë “apnea obstruktive të gjumit, alergjitë sezonale, artriti kurrizor dhe neuropatia periferike shqisore e këmbëve”.
“Presidenti ndihet mirë dhe ekzaminimi i këtij viti nuk tregoi ndonjë problem të ri. Ai është ende i aftë për detyrë dhe i kryen plotësisht të gjitha përgjegjësitë e tij pa asnjë përjashtim apo rregullim”, tha ai.
Biden tha më parë se rezultatet e rishikimit të tij sistematik këtë vit nuk ishin të ndryshme nga ato të vitit të kaluar.
Pas kthimit të tij në Shtëpinë e Bardhë, ai tha me shaka se mjekët mendonin se ai “dukej shumë i ri”.
“Asgjë nuk është ndryshe nga viti i kaluar. Gjithçka është e mrekullueshme”, tha Biden.
Kritikët e tij kanë kërkuar transparencë më të madhe nga Shtëpia e Bardhë në lidhje me shëndetin e Bidenit, si fizik ashtu edhe mendor, pasi një raport i fundit i këshilltarit të posaçëm tha, ndër të tjera, se presidenti i SHBA është një “plak me qëllime të mira por me kujtesë të dështuar”. /tesheshi.com/
