E paprecedent ajo që ka ndodhur apo po ndodh në familjen Muskurti me origjinë nga Dibra, e cila prej dje është në zi, pasi Hamzai, njëri nga djemtë, vrau të vëllanë, Dritanin me të shoqen, pas konflikteve lidhur me një biznes te Rruga e Kavajës. Sipas rrëfimit të një fqinjeje të familjes së tyre te Rruga 5 Maji, ato janë nën ngujim tashmë, pasi mundet të ketë hakmarrje brenda vetë gjakut.
“Kishim kuptuar diçka se hidhin në Facebook, akuzonin njëri-tjetrin hapur. Tmerr nuk ka, të vrasë vëllai vëllanë. Në xhenaze janë vetëm njerëzit e nuses që kanë ardhur nga Fushë-Kruja, ata të tjerët janë mbyllur në shtëpi e nuk shkojnë. Nuk shkon e ëma në xhenazen e të birit. Kanë frikë se i kërcënojnë, se kanë sherr”, tha një grua, fqinje e familjes Muskurti, duke folur për Euronews Albania.
Kujtohet se çifti i vrarë ka lënë tre fëmijë pas, pra tre fëmijë të cilët do duhet të vijojnë jetën pa nënë e pa baba, ekzekutuar nga xhaxhai.
Ky i fundit thuhet se nuk ka shprehur pendesë para hetuesve, duke thënë se ata e meritonin(vrasjen). Ndërkohë është shfaqur një tjetër video, ku vrasësi kthehet te dyqani pak minuta pasi ka shtënë ndaj të vëllait dhe kunatës dhe, pasi i sheh të vdekur, vë duart në kokë dhe largohet.
Ndërkohë, fqinja kujton pikërisht fëmijët e çiftit të vdekur. “Dje më erdhi djali i vogël i saj 8-9 vjec dhe bleu gjëra këtu. Sa fëmijë të urtë, të edukuar, kemi 20 e ca vjet këtu bashkë”, u shpreh ajo. /tesheshi.com/
