Presidenti francez Emmanuel Macron dhe i emëruari për kancelar konservator gjerman Friedrich Merz ranë dakord në një takim në Paris për të hapur një kapitull të ri në marrëdhëniet franko-gjermane, tha një burim i afërt me Merz për Reuters.
Macron priti Merz, i cili do të bëhet kancelar pas fitores së partisë së tij në zgjedhjet parlamentare të dielën, në Pallatin Elysee të mërkurën në mbrëmje, njoftoi Pallati Elysee.
“Së bashku, vendet tona mund të arrijnë gjëra të mëdha për Evropën,” shkroi Friedrich Merz në platformën X pas takimit.
“Faleminderit shumë, i dashur Emmanuel Macron, për miqësinë dhe besimin që tregoni në marrëdhëniet franko-gjermane”, shtoi ai, në frëngjisht dhe gjermanisht, në mesazhin e shoqëruar me një foto të dy liderëve.
Gjendja e jashtëzakonshme në Evropë
Kjo është një vizitë jashtëzakonisht e shpejtë nga Merz në Paris, vetëm tre ditë pas zgjedhjeve gjermane dhe kur ai sapo kishte filluar bisedimet me socialdemokratët për përpjekjen për të formuar një koalicion qeveritar, thekson Reuters.
Macron “integroi bashkëbiseduesin e tij të ardhshëm gjerman në diplomacinë e vazhdueshme të krizës shumë herët“, shkruan gazeta Sueddeutsche Zeitung.
Të dy do të diskutonin vizitën e fundit të liderit francez në Uashington dhe qëndrimin që ai do të mbajë ndaj Presidentit Donald Trump, i cili ka mërzitur aleatët evropianë duke anuluar mbështetjen e SHBA për Ukrainën në luftën e saj kundër pushtimit rus, thanë mediat.
Macron dëshiron të ringjallë marrëdhëniet franko-gjermane sa më shpejt të jetë e mundur në një gjendje të jashtëzakonshme për Evropën, në një kohë të përshpejtimit të afrimit midis Donald Trump dhe Rusisë, raporton Reuters. /tesheshi.com/
