Ervin Salianji, një ndër skifterët e PD-së në aksion e ligjërim politik, ka dhënë dorëheqjen nga posti i Sekretarit të grupit parlamentar. E ka bërë pasi nuk arriti të hyjë në kryesinë e re, e siç tha, vendosi të themelojë një standart.
“Gjykoj që çdo herë verdikti duhet lexuar qartë dhe duhen mbajtur përgjegjësi, mendoj që politika dhe Partia Demokratike ka nevojë për vendosjen e një standarti përgjegjësie, ku secili sipas funksionit mban përgjegjësi! Gjykoj që dorëheqja shumë shpesh e munguar në politikë duhet të kthehet standart! Funksioni im politik si sekretar i grupit parlamentar të Partisë Demokratike i takon të zgjidhet nga kryesia e re, për këtë arsye jap dorëheqjen! Kjo me jep më shumë mundësi të takoj dhe degjoj demokratet per tu pergatitur, dhe per te bere fushate per te rifituar besimin e organeve te larta te partisë!”, shkruan Salianji.
Por në mesazhin e tij lexohet mes rreshtash dhe një ironi, si shenjë mosdakortësie me votimin.
“Numërimi për kryesinë më nxori jofitues me 1 votë, kjo matematikë duhet lexuar me përgjegjësinë e duhur. Ndaj duhet marrë koha e nevojshme për të vendosur se çfarë duhet të bëj më shumë për të merituar besimin, për të luftuar me qeverinë, apo të bëj opozitë më të fortë për të qënë përfaqësues i demokratëve për një fitore edhe në numra edhe në frymë”, janë fjalët e demokratit riosh.
Ndërkorë, dorëheqja e tij përbën dhe një “goditje me spond” ndaj Bashës, duke i mëshuar faktin se po ofron një standart që duhet ndjekur dhe nga të tjerë, në rast humbjeje. /tesheshi.com/
