Ka kaluar vetëm një ditë pas ngjarjes së trishtuar të ndodhur ditën e djeshme në një nga sallat e gjykatës së Milanos në Itali, ku një person vrau me armë tre njerëz.
Sot, faqet e para të gazetave e kronikat kryesore të televizioneve italiane, sikurse edhe dje, janë hapur me lajmin e kobshëm dhe kanë pasqyruar tmerrin e frikën e përjetuar nga ana e qytetarëve dhe popullsisë, së ndodhur përballë një gjendjeje të tillë, ku qyteti duket thuajse fare i pambrojtur.
Është i tmerrshëm fakti që në mes të një institucioni me siguri kaq të lartë, si gjykata, dikush mund të hyjë pa u shqetësuar aspak dhe të vrasë pa iu dridhur dora tre persona. Çfarë mund të ndodhë në banesat e qytetarëve të thjeshtë në rast se këto barbari ndodhin në institucionet më të survejuara dhe mbrojtura?
Mediat vendase, përveç se kanë zbardhur dinamikën e ngjarjes, falë informacioneve të marra nga prokuroria dhe policia, kanë mundur të bëjnë edhe një vëzhgim të vogël në lidhje me jetën e mëparshme të autorit të masakrës, Claudio Giardiello, i cili është i akuzuar për mashtrim.
Vetëm një ditë pas ngjarjes, në orën 11:00, aktiviteti i gjykatës së Milanos do të ndalet, për të kujtuar viktimat e një dite më parë, ku tre persona humbën jetën ndërsa 2 të tjerë ngelën të plagosur. Pas ceremonisë, në sallën e madhe të gjykatës do të jetë një mbledhje e shoqatës së avokatëve, ku do t marrin pjesë gjithë avokatët e këtij qyteti.
Një minutë heshtje dhe pezullim i seancave gjyqësore ka ndodhur edhe në gjykatat e Bolonjës, Torinos dhe qyteteve të tjera./tesheshi.com/
