Kryeministri Rama shpërndau këtë mëngjes pamjet 3D të atij që konsiderohet se do jetë një lloj Dubai në Shqipëri, pikërisht në Durrës, ku Emiratet do të hedhin dy milliard dollarë investim.
“…Dhe me kënaqësinë e hedhjes së një hapi vendimtar dje, me nënshkrimin e Memorandumit të Bashkëpunimit, që hap rrugën drejt procedurës parlamentare për kontratën historike për ndërtimin e portit më të madh turistik të Mesdheut në Durrës, falë një investimi prej mbi 2MLD USD, me mbështetjen e drejtpërdrejtë të Presidentit të Emirateve të Bashkuara, Sheikh Muhammed Bin Zayed, ju uroj një ditë të mbarë”, shkruan Rama dhe përcjell pamjet.
Prej tre vitesh, kryeministri shqiptar negocioi me Emiratet për këtë lloj investimi, duke mundësuar ardhjen e një investitori si Muhammed El Alabbar.
Ai premtoi “diçka madhështore”, duke thënë se “ne do të krijojmë diçka që njerëzit kur të vijnë, do të duan të mos largohen kurrë”. /tesheshi.com/
