Duke pasur parasysh sjelljen e grupeve opozitare (VV, AAK dhe NISMA-s) gjatë mbledhjes së kaluar plenare, si dhe paralajmërimin e tyre se do të ndërmarrin veprime për të pamundësuar edhe mbledhjen e nesërme të Kuvendit, sot, Kryesia e Kuvendit mbajti mbledhjen e saj, në të cilën është diskutuar rreth mbarëvajtjes së mbledhjes, së paraparë për nesër.
Mbledhjen e kryesoi kryeparlamentari, Kadri Veseli, në të morën pjesë shefat e grupeve parlamentare, por, jo edhe ata të opozitës, përfshirë këtu edhe nënkryetaren e Kuvendit, Aida Derguti (VV).
Kreu i Kuvendit, Veseli, fillimisht tha se kryetari i Kuvendit, nuk ka marrë as një veprim i cili do të përshkallëzonte gjendjen e krijuar, ndërsa u shpreh këmbëngulës që të vijohet me punën, pavarësisht qëndrimit të opozitës. Kuvendi, tha ai në vijim, ka para vetes miratimin e shumë ligjeve që janë me interes për qytetarët.
Duke folur për veprimet e opozitës, kryeparlamentari, Veseli, tha se ato kanë qëllime politike të cilat nuk duhet manifestuar në këtë mënyrë. Ai po ashtu vlerësoi se qytetarët duhet qëndruar larg këtyre zhvillimeve, të cilat nuk janë në të mirë të tyre.
Shefi i Grupit Parlamentar të LDK-së, Ismet Beqiri, vlerësoi se deri më tani pozita është treguar shumë tolerante dhe kërkoi zbatimin e Rregullores së Punës së Kuvendit.
Ngjashëm është shprehur edhe shefi i Grupit Parlamentar të PDK-së, Adem Grabovci. Ai tha se pozita është treguar e matur dhe këmbëngulëse në zhbllokimin e punës së Kuvendit. Sjellja e paraqitur nga opozita ka krijuar imazh të keq për vendin, ndërsa qytetarët pësojnë më së shumti nga gjendja e krijuar, tha ai.
Në vijim foli nënkryetari i Kuvendit, Xhavit Haliti. Ai vlerësoi se zgjidhja më e mirë është debati në Kuvend, e jo bllokimi i tij. Ai shprehu bindjen se për çështjet e ngritura më së miri është të bisedohet, ndërsa vlerësoi se Kuvendi në as një rrethanë nuk do të merrte veprime të antikushtetuese dhe antiligjore.
Se Rregullorja e Kuvendit duhet respektuar pa asnjë hezitim, u shpreh edhe nënkryetari tjetër i Kuvendit, Sabri Hamiti. Ai në vijim tha se as një grup opozitar nuk ka të drejtë të bllokojë punën e Kuvendit.
Lidhur me seancën e nesërme folën edhe nënkryetari i Kuvendit nga komuniteti serb, Sllobodan Petroviç dhe nënkryetarja e Kuvendit, nga Grupi Parlamentar 6+, Duda Balje.
Ata u angazhuan për tejkalimin e kësaj gjendjeje duke kërkuar nga opozita përmbajtje nga veprimet e deritashme.
Kryesia në vijim vlerësoi se vendimet e nesërme që do të marrë kryesuesi i mbledhjes do të jenë në harmoni të plotë me Rregulloren e Punës së Kuvendit, ndërsa, qëndrimi do të merret duke u bazuar në sjelljen e grupeve parlamentare të opozitës.
Në fund të mbledhjes së sotme të Kryesisë, po ashtu është marrë vendim për kontrollim të detajuar, të të gjithë pjesëmarrësve në aktivitetet e Kuvendit, përfshirë edhe kryeparlamentarin Veseli./tesheshi.com/
