Partia e radikalëve të majtë në Greqi, Syriza do t’i mbijetojë valës së mosbesimit popullor, pas thyerjes së premtimeve elektorale, kundër masave të kursimit që e sollën në pushtet më 25 Janar të këtij viti. Korrespondentët nga Athina thonë se kryeministri Cipras vijon të ruajë popullaritetin, pasi njerëzit e pëlqejnë ndershëmërinë e tij.
Ai tha se e urrente paketën e reformave, mirëpo Greqia nuk kishte zgjidhje tjetër. Këto deklarata duket se po mbajnë të bashkuar shumë mbështetës me Syriza-n.
Madje, edhe ata që votuan kundër reformave pas debatit maratonë në parlament, u shprehën se kanë besim tek kryeministri. Sipas tyre, ai u përfshi në një betejë me pak shanse për të fituar, po shmangu katastrofën, mbylljen e bankave dhe vdekjen e papritur të ekonominë.
Nga ana tjetër, ka fraktura në bllokun monolit, që detyroi marrëveshjen e Brukselit. Kjo, pasi FMN, ka dalë pothuajse hapur kundër marrëveshjes së nënshkruar në Bruksel, duke thënë se borxhi i Greqisë është tepër i paqëndrueshëm dhe duhet ristrukturim, e njëjta kërkesë e Cipras.
FMN është një prej kreditorëve të dy paketave të para për Greqinë, por sipas rregullores së saj, nuk mund të përfshihet në dhënie huaje të re nëse mendon se borxhi është i paqëndrueshëm. /tesheshi/
