Më shumë se 300,000 fëmijë afganë po përpiqen të mbijetojnë në kushte të një dimri të akullt pa veshje dhe ngrohje të përshtatshme dimërore, ka njoftuar organizata britanike humanitare Save the Children.
Konflikti i vazhdueshëm ka shkatërruar shumë shtëpi dhe ka detyruar mijëra fëmijë të kërkojnë strehim në kampe, sipas kësaj organizate jofitimprurëse, e cila shtoi se “ata rrezikohen nga uria, sëmundjet, përfshirë COVID-19 dhe madje nga vdekjet prej të ftohtit “.
Chris Nyamandi, drejtori i degës lokale të organizatës jofitimprurëse Save the Children në Afganistan, tha se bora e rënë në veri të vendit kishte një efekt veçanërisht shkatërrues tek fëmijët.
“Më të rrezikuarit janë fëmijët, shkollat e të cilëve janë mbyllur për shkak të përkeqësimit të kushteve të motit. Familjet e tyre nuk kanë para për t’u blerë rroba dhe këpucë dimërore, kështu që ata janë të detyruar të qëndrojnë në shtëpi të ftohta”.
Në pjesët e goditura nga të ftohtit në Afganistan, shkollat do të qëndrojnë të mbyllura deri në mars. Në këto zona, temperatura mund të bjerë ndjeshëm deri në minus 27 gradë Celsius.
Organizata tha se do të siguronte veshje të ngrohta, këpucë dhe pajisje të tjera të nevojshme për më shumë se 100,000 familje në 12 nga 34 provincat e Afganistanit, pasi i ftohti i fortë atje zgjat deri në mars.
Në fund të nëntorit, organizata publikoi të dhëna sipas të cilave më shumë se 26,000 fëmijë u vranë dhe u plagosën në konfliktet në Afganistan nga 2005 në 2019.
Në të njëjtën kohë, një analizë e pavarur nga Shoqata Save the Children 2019 sugjeron që Afganistani ishte vitin e kaluar vendi më vdekjeprurës në botë për fëmijët. /tesheshi.com/
