Për dallim prej përfaqësuesve të Listës Serbe të cilët kanë konfirmuar se nuk do ta votojnë Demarkacionin me Malin e Zi edhe pse qeveria “Haradinaj” po tenton t’ua ndryshojë këtë qëndrim, është një deputet nga minoriteti serb që tashmë ka konfirmuar votën pro, siç thotë pa kurrfarë kushtëzimi. Eshtë ky Sllobodan Petroviç, deputet i Partisë Liberale (SLS), i cili thotë se ratifikimi i marrëveshjes në fjalë është në të mirë të gjithë qytetarëve.
“Qëndrimi ynë (SLS) nuk ka ndryshuar për këtë çështje, kështu që ne do të jemi në mbledhje kur ajo të mbahet, kjo nuk varet nga unë. Por, kur të mbahet mbledhja për demarkacionin unë do të jem prezent dhe do të votoj ‘për’. Nuk kemi të drejtë që qytetarët tanë t’i mbajmë të izoluar dhe jam i sigurt që qytetarët dëshirojnë që kjo çështje të zgjidhet në mënyrë që t’iu mundësohet liberalizimi i vizave, respektivisht t’iu mundësohet lëvizja e lirë, sepse Kosova është vendi i vetëm në Evropë, ku njerëzit nuk kanë mundësinë të udhëtojnë atje ku dëshirojnë”, ka deklaruar ai për “Zërin”.
Lidhur me mbështetjen ndaj marrëveshjes në fjalë, Petroviç ka thënë se partia e tij nuk ka vendosur asnjë kushtëzim në drejtim të partnerëve të koalicionit.
“Në asnjë mënyrë nuk kemi kushtëzuar askënd për votën tonë, sepse jemi të përkushtuar të votojmë pasi që kjo është në interesin e të gjithë njerëzve që jetojnë në këto hapësira dhe besoj që te shumica e deputetëve do të mbretërojë para së gjithash përgjegjësia ndaj njerëzve tanë dhe që në mbledhjen e ardhshme të ketë vota të mjaftueshme në mënyrë që të mbyllet kjo çështje”, ka deklaruar ai.
Ndërkohë, sa i përket qëndrimit të Listës Serbe karshi kësaj marrëveshjeje, Petroviç ka thënë se nuk ka ndonjë informacion, pos atyre që janë shpërfaqur në media.
“Unë nuk kam njohuri për aktivitetin e tyre, por përmes mediave kam mësuar se kishte njëfarë takimi në mes të Listës Serbe dhe kryeministrit, respektivisht bartësve të institucioneve. Domethënë, nuk kam njohuri rreth diçkaje që mund t’ju them përveç asaj që kam lexuar në shtyp”, ka theksuar ai. /tesheshi.com/
