Një dedikim nga Elisa Spiropali mbi Kadarenë e ndjerë prej një dite, ka nxjerrë në pah një aspekt të marrëzisë njerëzore në këtë rast, atë të shenjtërimit të njeriut, sado i aftë në një drejtim.
Edhe pse metaforikisht, ajo shkon deri aty sa i jep shkrimtarit krejt vdekatar, si çdokush, atribute hyjnore. Pse? Sepse thjesht ka shkruar bukur, tej veneracionit nacional si shqiptar.
Paradoksi është se dhe vetë Spiropali ka shkruar letrarisht bukur, por substancianlisht ka shpëfaqur më tej se një budallallëk, një marrëzi kolosale, ose, siç do thoshte Shvejku, një idiotizëm në katror.
“Hyu Kadare
Hyu Kadare nuk qe një ardhës dhe ikës i zakonshëm, një shëtitës, një kalimtar, ndër të shumtit e kësaj bote.
Hyu Kadare ishte i rrallë, i çmuar, i jashtëzakonshëm.
Kadare ishte nga raca e qiellorëve, gjenialëve, profetëvë. Atyre që popujve, kombeve, komuniteteve, bashkësive, racave, u sjellin fat kur janë në mjerim, u tregojnë zgjidhje kur janë në hall, në vështirësi, në moment kritik, u sjellin një udhërrëfyes kur nuk dinë nga t’ia mbajnë, kur zjarri po fiket dhe duhet ndezur, kur drita meket dhe duhet gjallëruar.
Hyu Kadare erdhi, mblodhi shkarpat, ndezi zjarrin, edukoi brezat, frymëzoi miliona individë, nuk la të degradojë shija, të shprishet estetika, të kalbet dëshira për të lexuar, punuar, kontribuar për një Shqipëri të mbarë e të begatë.
Kadare ushqeu shpirtërisht dhe lartësoi mendërisht një popull të tërë.
Kadare e ngriti Shqipen dhe Shqipërinë në lartësi dhe largësi të panjohura më parë.
Mjerë kritizerët trukokallë që thonë se qe i tillë si shkrimtar, e i atillë si njeri, dhe broçkulla të tjera që Hyut veçse ia shtojnë lavdinë, dhe mediokrit i hedhin në honet e harresës.
Ta nderojmë, respektojmë, kujtojmë në pafundësi, është më e pakta që duhet dhe mund ta bëjmë për Hyun Kadare që erdhi na fali gjithçka, dhe iku pa na marrë asgjë”, shkruan Spiropali.
Në fakt, Shqipëria ka përfituar indirect nga Kadare, pra prej famës së tij, por direkt, si një referencë morale apo botëkuptimore për qenien e shqiptarit, ka qenë tejet i diskutueshëm. /tesheshi.com/
