Kancelarja gjermane Angela Merkel, në një ceremoni në Berlin të hënën në mbrëmje, u nderua me Çmimin Fulbright për Mirëkuptim Ndërkombëtar.
Çmimi, i cili është emëruar sippas ish-senatorit amerikan J. William Fulbright, u jepet personave që në “mënyrë të veçantë kanë kontribuar në avancimin e paqes përmes mirëkuptimit më të madh mes popujve, kulturave dhe popujve.”
Merkel, kur mori çmimin, paralajmëroi për rreziqet e nacionalizmit dhe populizmit në rritje dhe bëri thirrje për më shumë përpjekje për të mbrojtur të drejtat e njeriut në mbarë botën.
“Në shumë vende, duke përfshirë Gjermaninë, ne jemi dëshmitarë të rritjes së populizmit dhe nacionalizmit ekstrem”, tha Merkel.
Ajo shtoi se është e domosdoshme të ndalohen shkeljet e normave të së drejtës ndërkombëtare.
“Parimet themelore dhe normat e së drejtës ndërkombëtare dhe të drejtave të njeriut janë në rrezik. Ne duhet të përballemi me to”, tha kancelarja gjermane.
Fondacioni Fulbright në Uashington tha se Merkel u nderua për angazhimin e saj për të ndërtuar paqen dhe bashkëpunimin midis vendeve dhe njerëzve.
Fituesi të mëparshëm të këtij çmimi janë Nelson Mandela, Jimmy Carter, Bill dhe Melinda Gates. /tesheshi.com/
