Sisa Abu Daooh ka jetuar duke u veshur si mashkull për 43 vite rresht, në mënyrë që ti lejojë se bijës një jetë dinjitoze dhe të mos i mungojë asnjë gjë, pas vdekjes së të shoqit. Për qeverinë egjiptiane, gruaja është një “nënë ideale”. Ky titull mirënjohjeje i është dhënën nga qeveria, si grua kryefamiljare, për punën e rëndë të bërë gjatë viteve, për të bijën dhe nipërit e mbesat e saj.
Sot Abu Daooh është 46 vjeç. Ajo ka humbur bashkëshortin në kohën që ishte shtatzënë dhe pasi solli në jetë të bijën, u gjend në një situatë të pashpresë, pa asnjë ndihmë dhe të ardhur.
Ajo që e vështirësonte më tej situatën e gruas në atë kohë, ishte kultura, e cila ndalonte gruan të kryente shumë punë, ndaj ajo u detyrua të vishej si burrë për të përballuar nevojat e së bijës Houda.
E veshur me pantallona të gjata, me këpucë meshkujsh dhe me një çallmë në kokë, Abu Daooh ka mundur të bëjë punë të ndryshme, mes së cilave lustrimi i këpucëve apo punë të rëndomta në ndërtim. Gruaja ka vijuar punën e saj edhe pasi e bija u martua, pasi dhëndri i saj u sëmur dhe e kishte të pamundur të mbante familjen. Shpresonte që një ditë të mund të dilte në pension, por ja që nuk ndodhi kështu.
Gruaja ka treguar se ka preferuar të bëjë punë të rënda, se sa të endej rrugëve duke kërkuar lëmoshë për të bijën apo për nipërit e mbesat e saj. “Për të shpëtuar nga ngacmimet e meshkujve apo nga shikimet e tyre, preferova dhe zgjodha të shtirem e maskohem si një mashkull. E veshur si ata, kam punuar pranë meshkujve në punë të ndryshme, në fshatrat përreth, ku askush nuk më njihte”,- ka treguar gruaja e moshuar.
Burrnesha, e ngjashme me ato shqiptaret, aktualisht, duke qenë se është në një moshë të thyer, pastron këpucët dhe thotë se deri sa mosha t’ia lejojë, do të vijojë të bëjë këtë punë.
E bija, Hounda ndihet tepër krenare për të: “Mamaja ime është shefja e kësaj familjeje dhe nga ajo varet gjithçka. Zgjohet çdo mëngjes në orën 6 për të pastruar këpucët në rrugë, në mënyrë që ne të kemi mundësinë për tu ushqyer”.
Një rast tjetër ky i një burrneshe, por këtë herë, jo shqiptare, e cila jep një mesazh të fortë të mbijetesës për çdo person që jeton në skajet e varfërisë./tesheshi.com/
